KRALENDIJK – Diamars un di e gruponan di whatsapp ku ta kompartí kontrolnan di polis tabata hopi drùk. Ku un bùs Polis di Boneiru a kore kontrolá di sitio pa sitio na: New Wei Taai, Bonanza, restorant Het Consulaat,  Winefactory, Papa Smurf i riba Kaya Grandi.

Parse ku esaki a bira un strategia nobo di polis. Nan ta bai un sitio ku un bùs. Un agente ta para kant’i kaminda i ta hala outonan un banda. E shofùr mester mustra e aspirante di polis su papelnan di seguro i su reibeweis. Si resultá ku esakinan no ta na òrdu ta sigui un but. Si e outomobilistanan no tin faha bistí òf e shofùr ta papia na telefon durante ku e ta kore, ta sigui otro but.

Formashon di agentenan aspirante 

Segun un di e agentenan ta trata di formashon di e aspirantenan: “Enberdat nos ta kontrolá e informashonnan ei. Si nan no ta na òrdu, ta sigui un but. Ta bèrdat ku nos ta move bai diferente sitio. Esei ta nesesario tambe, sino e usadónan di kaminda no ta tuma nos na serio.”

Na Boneiru no ta eksistí un app manera ‘flitsmeister’ (un app ku ta avisá unda tin kontrol òf si bo ta koriendo muchu duru) òf notisia di radio pa bisa unda tin kontrol. Tin si diferente gruponan di whatsapp aktivo. Den e gruponan aki outomobilistanan ta avisá otro di kontrolnan ku polis ta teniendo. Despues di un dia yen di kontrol, e gruponan di whatsapp aki ta haña hopi inskripshon di partisipantenan nobo.

Eskohonan spesial

Ta keda remarkabel si ku polis ta keda pone énfasis riba kontrol di papelnan di outo, faha i un reibeweis bálido. De bes en kuando ta tene tambe kontrol di alkohòl. E pregunta ta keda si e ta yuda di bèrdat. Frekuentemente den madrugá outonan ta kore zigzag riba kareteranan di Boneiru. Ta parse ku kuatnan ku ta kore riba dos wil den kayanan òf ta duna molèster di zonido te ku awor ta sigui hasi esaki sin hopi problema. Apenas ta duna but tambe ora ta kore ku hopi trahadó den konstrukshon òf turista patras den un pikòp. Tampoko no ta ataká motersaikelnan ku ‘wheelies’ (un wil no ta toka suela) ku tin biaha ta okashoná situashonnan peligroso inesesario.