KRALENDIJK – Kuerpo Polisial Karibe Hulandes (KPCN) a detené e último dianan na Boneiru kuater persona ku tabata stür bou di influensia di alkohòl. Di un persona a konfiská su reibeweis. 

E promé detenshon tabata riba djabièrnè 11 di ougùstùs alrededor di 10’or di anochi. Djis despues ku riba Kaya Nikiboko Zuid a tuma lugá un dalmentu di outo frontal, un otro vehíkulo a kore kai den un buraku hundu i a keda pegá. Na momento ku polis a aserká e shofùr di e vehíkulo, nan a hole mésora un holó di alkohòl. Ademas e shofùr su lenga tabata pisá. P’esei a hasi un tèst di alkohòl. A base di e resultado a detené e shofùr di 41 aña. A hiba e outo warda di polis i a konfiská su reibeweis.

Riba djasabra 12 di ougùstùs, den kareda di 2.30 di madurgá, a detené un señora di 41 aña, ku tabata kore bou di influensia di alkohòl i ku no a sigui instrukshon di polis. A para e sospechoso ora ku e tabata kore deskabeyá. A orden’é diferente biaha pa hasi un tèst di alkohòl, pero e no tabata koperá i tabata komportá agresivo ku e polisnan.

Djaluna 14 di ougùstùs madrugá a detené un hòmber di 35 aña pa korementu bou di influensia di alkohòl. A para e sospechoso ora el a kore drenta direkshon prohibí riba un skuter. Durante e kontrol por a ripará ku e sospechoso tabata bou di influensia di alkohòl. A base di e resultado di un tèst di alkohòl, a deten’é. E mésun anochi a detené tambe un hòmber di 31 aña pa korementu bou di influensia. E sospechoso tabata kore den direkshon prohibí riba Kaya Aruba, na momentu ku a par’é pa kontrol. A deten’é despues di resultado di e tèst di alkohòl ku a hasi serka dje tambe.