KRALENDIJK – Último dianan Kuerpo Polisial di Karibe Hulandes (KPCN) a tene kontrol di tráfiko aktivo pa mantené seguridat den tráfiko i kaminda a duna diferente but pa vários violashon di tráfiko.

Djamars 22 di ougùstùs a hala un shofùr un banda riba Bulevar Miguel Pourier. E vehíkulo no tabatin plachi di number i e shofùr no tabatin faha di seguridat bistí. El a haña un prosèsverbal pa ámbos violashon.

Un dia promé, riba djaluna 21 di ougùstùs, den kareda di 6’or di atardi un kontrol di rutina riba Kaya Ka’i Orgel a resultá den un prosèsverbal pa un shofùr ku no tabatin un reibeweis bálido.

Den un otro situashon, alrededor di 14.45 riba e mésun djaluna ei, a atrapá un outomobilista ku tabata papia na su telefon riba Kaya Grandi i el a haña un but pa papia na telefon tras di stür.

Algu promé, pa 14.30, a para un pikòp na Kaya Nikiboko Zuid despues ku a gara un shofùr ku tabatin un telefon den su man na momento di kore outo.

Djaluna 21 di ougùstùs tambe a para diferente shofùr di trùk i a duna nan but pa diferente violashon manera kore sin dokumentunan bálido di seguro, sin reibeweis i sin faha di seguridat.

Riba e mésun dia polis a tene un kontrol di tráfiko planiá den Rincon den oranan di atardi. A parti na tur 12 prosèsverbal pa violashonnan di tráfiko manera no bisti faha di seguridat i falta di un reibeweis bálido.

Polis lo sigui kontrolá e dianan benidero pa mantené seguridat den tráfiko.