Notisia

Polis ta konfirmá di a neutralisá kachónan agresivo na Lagun Hill

Polis ta konfirmá di a neutralisá kachónan agresivo na Lagun Hill
Asina pia di e viktima, ku a risibí mordé den su man tambe, a keda djamars despues di e atake

KRALENDIJK- Djaweps atardi pofin Kuerpo Polisial (KPCN) a konfirmá di a tuma akshon kontra di un grupo di kachó na Lagun Hill, ku den un lapso di tempu kòrtiku a morde seriamente dos habitante di e bario ei. 

“Riba djamars promé di febrüari sentral di polis a risibí notifikashon ku kachó a morde un persona na Lagun Hill. Na yegada di polis ambulans tabata na e sitio i e personal tabata dunando e hòmber asistensia médiko pa heridanan di mordé na su man i pia. Doño di e kachónan a deklará ku un di su yunan a lubidá di sera e porta di kura dor di kua algun kachó a sali pafó i a ataka e hòmber ku tabata pasando eifó”, asina bosero polisial ta informá.

Según KPCN, ta trata di doño di e mesun kachónan ku desèmber último a laga un hòmber di 86 aña ku herida di morde despues ku e kachónan a drenta kura di e víktima dor di un buraku den e waya di e kura. E insidente ku a tuma lugá den desèmber aki a duna motibu pa hasi un investigashon di bario i tambe a papia ku doño di e kachónan.  Despues di esaki KPCN a traha un rapòrt ku e petishon na Gezaghèber pa nombra e kachónan aki komo peligroso, konforme artíkulo 8, insiso 1 di e Lei di Kachó Boneiru 1997, i pa informá doño di e kachónan di esaki pa medio di un karta.

Kondishon

A entregá e karta, ku den dje entre otro e kondishonnan pa e tin su kachónan na liña ora ta riba kaminda públiko i tambe ku su kura mester ta di tal forma ku e kachónan no por sali for di e kura, na e doño di e kachónan. E karta aki tabata e último aviso di gezaghèber. Si despues di esaki no kumpli ku e kondishonnan stipulá den e karta, polis tin e outorisashon di gezaghèber pa, despues di konfiská e kachónan, eventualmente pasa nan angua. 

Angua

Mirando ku doño di e kachónan no a kumpli ku e kondishon pa tene e kachónan paden, polis a duna dòkter di bestia òrdu pa pasa seis di e kachónan angua i hiba un di e yunan di kachó na un otro adrès despues di e insidente di promé di febrüari.

Rabiá

Hopi habitante di e bario ta rabiá ku Reina i departamento di Polis, pasombra ta sinti ku no a tuma e kehonan na serio. E incidente di desèmber no tabata e promé insidente. Tambe ta sinti ku e doñonan di e kachónan a trata di bagetalisá e situashon i no a tuma e asuntu muchu na serio. 

Pia di e promé viktima, asta despues di 6 siman a keda di un forma asina horibel, ku Awor.nu no ke ni kompartí esaki pa hende wak. E hòmber lo mester risibí un transplante di kueru, pa e pia por sigui kura. 

Deel dit artikel
Rocargo
Rocargo
Rocargo
Rocargo