WILLEMSTAD – Polítika na Aruba, Kòrsou i Sint Maarten no ta okupá nan mes ku kambio di klima. I si nan ta hasi’é tòg e ta solamente un ehersisio riba papel, asina John Samson di Caribisch Netwerk ta konkluí tokante kambio di klima riba islanan di Karibe.

Parlamentu di Kòrspu por ehèmpel nunka a tene un debate riba efektonan di kambio di klima. Samson ta puntra su mes kiko gobièrnu di Kòrsou di MFK i PNP ke.

Den e akuerdo di gobernashon tin dos asuntu menshoná ku ta trata klima: hasi mas investigashon i duna informashon.

Aruba ta profilá su mes komo e fakansi di solo ideal den Estados Unido. Pero e isla ta hasi muchu tiki uso di panelnan solar, por bisa un porshento so.

I ta netamente turistanan ta gasta hopi energia, pero hotèlnan i nogoshinan ku ta hür outo apenas ta usa energia duradero.

Polítika di Aruba ke bai di djes porshento na kuarenta porshento energia duradero den 2030, pero netamente awor e isla ta skohe pa usa mas gas líkido pa produsí awa i elektrisidat.

Podcast

E krísis di klima riba islanan di Caribe lo tin hopi konsekuensia grandi segun Samson. Den e podcast ‘De Vergeten Klimaatcrisis’ na NPO Radio 1 e reportero ta amplia riba efektonan di kambio di klima pa Aruba, Boneiru, Kòrsou, Saba, Sint Eustatius i Sint Maarten.

Eiden Samson ta menshoná nuebe punto di preukupashon. Por ehèmpel kuminda ta bira impagabel, pobresa i desigualdat ta bira mas grandi i e parti fértil di suela ta disparsé pa motibu di planta mas i mas awaseru ku tin eroshon komo konsekuensia.

Den Haag

Kabinete Hulandes tambe ta haña e mésun krítika di Samson pa loke ta trata enbolbimentu den kambio di klima i e islanan. Segun Samson lo ta papiando hopi tokante ideanan i solushonnan. Minister Rob Jetten di Energia i Klima lo a bini ku un plan promé ku fakansi di verano pa e tres munisipionan spesial den Karibe, pero esei no t’ei ainda.

Kabinete mester bini ku un kontesta riba e pregunta kon Boneiru, Saba i Sint Eutatius lo por bai drei kompletamente riba energia duradero. Tambe e kabinete lo mester informá kon e paisnan Aruba, Kòrsou i Sint Maarten lo por haña ayudo.

• Por skucha e podcastnan  https://podcastluisteren.nl/pod/De-Vergeten-Klimaatcrisis