Por siña skibi kuenta i poema den Siman di Buki

KRALENDIJK- Pa siña hóbennan kon pa skirbi un kuenta òf un poema Biblioteka Públiko ta organisá, durante siman di buki, un tayer pa alumno di skol básiko di grupo 5 te ku grupo 8. Siman di Buki lo ta di 8 di novèmber pa 11 di novèmber 2021. E tema ta: “Bira loke bo ke”.

Jefferson Rosalia lo duna e parti práktiko di e tayer. Segni Bernadina ta enkargá ku e parti di teoria. Pa e parti di teoria e hóbennan lo siña kon pa usa nan fantasia i inspirashon pa e tipo di storia ku e ta bai skibi. Asina e hóben ta siña kon pa strukturá un storia for di komienso te final. E tópiko pa e tayer ta bai tokante profeshon. 

Bibu

Pa e parti práktiko, esaki ta bai kon pa artikulá, kon pa presentá e kuenta na un manera ku e ta bira bibu pa esnan ku ta les’é òf tendé. Tambe e hóbennan lo siña kon pa usa e lenguahe korporal i variashon di bos i tono.  Biblioteka Públiko ta gradisí e mayornan ku ta laga nan yu partisipá na e tayer “Bira loke bo ke”.