KRALENDIJK- Despues di basta aña di problema persistente i frustrashon, finalmente tin un solushon na horizonte pa loke trata e problemanan di kaya i alabes drenahe na Tanki Matrimonio. 

Diputado di Infrastruktura, Anjelica Cicilia, a splika djabièrnè ku Entidat Públiko awor ta den kòmbersashon ku desaroyadó di e proyekto, pa huntu solushoná e problema di infrastruktura den e bario.

Habitantenan di e bario kada bes despues di yobida algu fuerte ta man na kabes dor ku e kayanan ta kambia den burakunan di lodo, yen di awa di forma ku kasi no por sali for di kas of yega bèk na esaki. Ya pa basta aña tin un ‘tira i hala’ tokante ken ta responsabel pa solushoná e problema òf ken, den pasado no a kumpli ku loke mester a hasi pa loke ta trata e ret di kaya den e bario.  

Responsabilidat

“Ámbos partido mester tuma nan responsabilidat awor i kumpli ku nan parti. Nos ta den kòmberashonan konstruktivo i nos ta spera di anunsiá dentro di poko na ki palabrashon konkreto nos a yega pa resolvé e situashon aki”, Cicilia a bisa.