Kralendijk- E preis pa gasolin na Boneiru ta bai subi kas 20% entrante djabièrnè dia 7 di mei 2021. Segun gobièrnu e subida di preis ta nesesario, pasobra preis di kompra tambe a subi. Ta mustra riba e echo ku for di yüli 2020 e tarifanan máksimo di kombustibel no a kambia.

Espektativa ta ku den e periodo binidero e tarifanan lo sigui subi. Esaki ta bini prinsipalmente pasobra no a inkluí e asina yamá ‘Fuel supply guarantee’ (garantia di suministro di kombustibel) kompletamente den e tarifanan di luna di mei.

Rekargo

E fasilidat aki ta e rekargo den preis di kombustibel komo konsekuensia di e situashon na e refineria na Kòrsou. Pa motibu ku na Kòrsou pa basta tempu kaba no tin un operadó, pero e refineria tin ku keda parsialmente operashonal sí pa e fasilidatnan di kombustibel di Kòrsou i Boneiru, e gastunan èkstra aki ta bini pa kuenta di e kombustibelnan aki.

E rekargo aktual na Kòrsou ta 24,42 sen di dòler pa liter di gasolin òf disel. Na e momentu aki Entidat Públiko Boneiru ta investigando ainda kua rekargo mester kalkulá den e tarifanan pa Boneiru. Tambe Entidat Públiko Boneiru ta investigando te kon leu mester adaptá e márgennan na Boneiru.