Preparashonnan den pleno desaroyo pa e promé kareda di 10K na Saba

THE BOTTOM – Dia 6 di mei ta tuma lugá pa promé biaha un kareda di 10 kilometer na Saba. E komienso ta na Will’s Bay i e ta finalisá na Mountain Road. Partisipantenan por sea partisipá nan so òf skohe pa partisipá den un tim di relevo ku kuater persona.

Mayoria parti di e kareda ta subiendo seru bai ariba. Partisipantenan ta pará dilanti di un start difísil ku un subida règt bai ariba na Well’s Bay Road, ta pasa dor di The Bottom, bai ariba na St. John’s i seguidamente pa Windwardside i Hell’s Gate. E buelta ta na parada di bùs di Hell’s Gate, di unda e partisipantenan ta kore bai bèk Windwardside i subi Mountain Road. E final ta na kabamentu di Bergweg. 

Jochem Batstra di Event 66 i Claire Nuyens di Chez Bubba Bistro ta organisá e kareda di 10K. Chez Bubba ta e spònser prinsipal di e evento. Despues di a organisá sinku edishon di e popular kareda i kaminata 5K Bizzy B, Batstra kier a ofresé un siguiente reto. “E karedanan di Bizzy B tabata hopi agradabel i tambe aksesibel mirando e distansia. Mi a haña petishon pa organisá algu otro, un evento di un nivel mas haltu ku hendenan por a spera ansiosamente i ku nan por a entrená p’e”, Bastra a bisa.

E kareda di 10K naturalmente lo ta mas  largu ku e 7K anual di Sea to Scenery, ku tradishonalmente ta tuma lugá durante e wikènt di Dia di Saba den luna di dezèmber. E Sea to Scenery, for di nivel di laman te na e tòp di Mount Scenery, ta mas haltu i mas règt ku e 10K. Pero e seru règt na komienso di e 10K lo drecha esei, Batstra ta bisa ku un sonrisa.

Relevo

Por partisipá na e 10K tambe den forma di relevo ku un tim di kuater persona ku kada un ta kana 2,5K. E kareda di 6 di mei ta pas den e ambishon di Saba pa promové un estilo di bida salú. Partisipashon na e kareda 10K ta habrí pa personanan di e otro islanan tambe i ta enkurashá nan pa bini Saba pa forma parti di e kareda spesial aki, e kareda 10K mas haltu den reino Hulandes. Inskripshon ta habrí. Bo ta haña informashon riba e página di Facebook di event 66.