Boneiru

Preukupashon pa plan di impuesto 2025 pa Hulanda Karibense

KRALENDIJK – Ta eksistí preukupashon pa e plan di impuesto 2025 pa Hulanda Karibense, spesialmente awor ku ta parse ku lo sigui intensifiká na aña 2025 e karga ku a inisiá na aña 2024.

Eksperto di impuesto i alabes miembro independiente di kolegio elektoral pa Hulanda, Jaap Kos, ta deskribí e plannan komo ‘absolutamente chokante’. Segun Kos e ta bai dal hopi empresa chikitu duru, pasobra nan ta biba kaba serka di márgen di pobresa. Ta trata e ora ei di por ehèmpel hasidónan di limpiesa, hardineronan, shofùrnan di taksi i barberonan ku podisé tin un, dos òf tres trahadó den un B.V. òf N.V.

“Den bon koperashon ku e frakshonnan di Eerste i Tweede Kamer di GroenLinks-PvdA i Christenunie a hasi aña pasá un seri di pregunta krítiko di Kamer na gobièrnu tokante e plan di impuesto pa islanan BES pa 2024. Mi a mustra riba e efektonan negativo pa empresarionan chikí i mediano ku un B.V./N.V. i a traha ehèmpelnan di kalkulashon, ku ta demostrá ku e kambio ku a presentá na e momento ei no ta pas den e esfuerso pa kombatí pobresa.”

Segun Kos e sekretario di estado saliente di Fiskal i Servisio di Impuesto, Marnix van Rij (CDA), a publiká lamentablemente luna pasá un propósito pa subi e impuesto di entrada pa entradanan mediano for di USD 50.000 te na 35,4% pa aña. Awor aki e tarifa mas haltu aki ta konta numa for di USD 322.769. Un otro propósito ku por sierto ta afektá atrobe e empresarionan ta e subida di  kobra impuesto riba pago di ganashi di empresarionan ku un B.V./N.V. di 5% pa 7.5%.

Koperashon 

Elektorado Jaap Kos ta primintí di hasi su esfuerso pa sali na interes di Boneiru: “Komo miembro di kolegio elektoral lamentablemente mi no tin e posibilidat di veto, pero pa medio di bon koperashon ku otro polítiko i stakeholder riba e isla i parlamentarionan na Den Haag lo por hasi nos influensia mas grandi si. Mi tin kontakto direkto regularmente ku miembronan di parlamento di diferente partido polítiko. E Plan di Impuesto pa islanan BES 2025 no por sigui asina”.

Kos ta primintí, meskos ku tabata e kaso ku e plan di impuesto anterior, pa sigui e plan di impuesto 2025 pa Hulanda Karibense krítiko i hasi su esfuerso pa konvensé e miembronan di Kamer ku argumentashon i kalkulashon pa tuma desishonnan prudente i ahustá e maneho di gobiernu.

Deel dit artikel
Rocargo
Rocargo
Rocargo
Rocargo