KRALENDIJK – Djamars 18 i djárason 19 di febrüari, Fundashon Museo di Mucha Boneiru a organisá un ‘train the trainer’ di dos dia na Boneiru. E entrenamentu akí a sirbi komo preparashon pa e promé proyekto piloto di Museo di Mucha Boneiru ku ta kuminsá na mei. Rohani de Pont, direktor di Museo di Mucha Kòrsou, a duna e treinen. Den esaki a enfoká riba e prinsipionan básiko di museo pa mucha, inklushon i impakto sosial, ròl di e treiner, forma di traha i material, dinámika di grupo i diseño di tayer. Biblioteka Públiko ta finansiá e train-the-trainer i tayer.
E promé proyekto piloto lo haña forma di tayer, pa kua vários artista boneriano a entregá proposishon. Finalmente a skohe e idea di e artista Ghyzhanne Martines. Na tur ta bai duna seis tayer na muchanan di tres diferente grupo di edat. Bou di guia di Martines, nan ta traha huntu na un obra di arte, segun e filosofia di museo di mucha. Finalmente ta eksponé e obra di arte akí na Biblioteka Públiko òf otro lugá públiko. Inskripshon pa e tayernan ta habri na prinsipio di aprel.
Ku e aktividatnan akí, Fundashon Museo di Mucha Boneiru ta pone e promé pasonan den desaroyo di un lugá inspirativo kaminda tur mucha di Boneiru por siña, hunga i krese. Sperando riba un sitio definitivo pa e museo di mucha, esaki ta sosodé den kooperashon ku Biblioteka Públiko Boneiru. E tayernan na mei i yüni ta bai tuma lugá na e lokalidat nobo di e biblioteka na Kaya Amsterdam.
Partisipantenan na e ‘train the trainer’ (foto) tabata Qhyzhanne Martines (artista), Ivy Lo Tam Soen (Sekretario di Proyekto di Museo di Mucha Boneiru), Jessica de Hooge (Konsehero di lesamentu na Biblioteka Públiko Boneiru), Rohani de Pont (Direktor di Museo di Mucha Kòrsou), Ghislaine Monte (Coach kultural/kreadó di programa arte, kultura i komunidat na Biblioteka Públiko Boneiru), i Barbara Tedder (Presidente di direktiva di Museo di Mucha Boneiru).
Fundashon Museo di Mucha Boneiru, fundá na 2023, ta komprometé su mes pa krea un lugá kaminda tur mucha di Boneiru den forma di wega por siña i eksplorá nan kuriosidat natural. Un museo pa mucha ta un ambiente úniko, interaktivo i edukativo ku ta enkurashá mucha pa eksperimentá, deskubrí i siña hasiendo. Ta un lugá kaminda tur mucha ta bonbiní, inkluso mucha ku limitashon.