Pronto por produsí mas asfalt na Boneiru

KRALENDIJK- Djaweps e kompania BWM Infrastructure, ku ta responsabel pa produkshon di afalt i drechamentu di hopi kaminda na Boneiru, a duna splikashon na prensa tokante desaroyonan na e kompania, i partikularmente e echo ku pronto lo por produsí konsiderabelment mas afsalt na Boneiru. 

Noville  Bartelomeo, direktor BWM Infrastructure Bonaire, a splika ku ta bai instalá e planta i den mas o ménos 2 siman, ya por saka asfalt for di e mashinnan nobo. Lógikamente ta tuma poko tempu pa siña traha ku e aparato asina moderno i si tur os ta na òrdu promé e bai den uso ofisialmente.   

E planta aktual ta saka 30 tòn pa dia. Esaki ta tarda hopi pa por asfaltá kamindanan rápido. Awor, e planta nobo ta 3 bia mas grandi, 90 tòn. Pues nos por traha mas rápido ku ménos ora di trabou. 

Wendel Bonifasio,  direktor di e kompania madre na Kòrsou i Boneiru a papia di e kambio drástiko ku ta bai tuma lugá na Boneiru. “Mi ta enkargá ku e kompanianan i nos mira ta definitivo. Nos ta konbertiendo hopi na Kòrsou. Kumpra diferente kos i hasi invershon grandi. Na Boneiru, kisas nos a invertí ménos kompará ku Kòrsou. Nos lo bai hasi mas invershon na Boneiru, poko poko nos lo trese esakinan den publisidat. E planta nobo aki ta un parti chikitu ku BWM Infrastructure a hasi. Un planta super moderno ku a kosta mas o ménos 2.5 mion dòler. Pues nos ta atendiendo e kosnan hopi na serio.  Momentu bo por inbertí, ta ora kos ta kana bon pa loke nos a hasi bon, esta e trabounan.

Mas trabou

Mas moderno e planta bira, mester di hende ku bon konosementu pa manehá nan tambe. Nos ke hendenan lokal, pa ehersé e trabou na e planta.  Boneiru tin un bon pista na aeropuerto, bon prizòn i kayanan ta mehorando i asina nos ta kontinuá, “e direktor general Wendel a bisa. 

“Kompará ku loke nos ta usando awor, e nobo ta hopi mas grandi. Planta aktual ta poko bieu i mester remplas’é.  E planta nobo por drei riba gas i diesel. Por raspa e kamindanan aktual i re usa e asfalt pa e bai bek riba kaya. E planta tin sistema pa fangu stof, loke ta evitá ku hende den bario ta bai haña problema ku stof. Hende ta bin di eksterior pa duna guia kon e planta mobil aki ta funshoná. Mobil, pasobra e ta fásil pa move di un sitio pa otro si ta nesesario. 

Preis no ta bai baha pa trahamentu di kaminda na Boneiru ku e planta nobo. Esaki debí ku trahamentu di kaminda tin diferente kos ku ta relatá na dje. Kisas e preis por baha den futuro, pero e ta dependé di hopi kos ku no ta den nos man. Tin trabou ta pone hende den komunidat pèrdè poko pasenshi, pero sa ku semper nos ta hasi e trabou ku bon intenshon i traha mas rápido posibel pa terminá, “ Martijn a bisa.