Pronto turista for di Merka i Hulanda por bula bai Boneiru sin nesesidat di PCR

Kralendijk- Si tur kos bai bon, entrante dia promé di yüli 2021, pasaheronan ku ta biaha for di Hulanda i for di Merka, lo no mester pasa tèst di PCR promé ku subi avion bin Boneiru.

Esaki sinembargo lo konta solamente pa pasahero ku ta kompletamente bakuná. Esnan ku no ta kompletamente bakuná si lo mester sigui hasi e tèst di PCR promé ku bula bai nos isla.

Segun gezaghèber Edison Rijna, e echo ku kontagionan nobo na e dos paisnan ta bahando hopi rápidamente, kombiná ku e echo ku hopi hende a bakuná kaba na ámbos pais ta hasi e fleksibilisashon aki posibel.

Nivel di riesgo

Mirando e desaroyo positivo pa ku Covid-19 na Boneiru, Rijna a anunsiá tambe ku entrante djabièrne dia 25 di mart, Boneiru lo bai nivel di riesgo 1, o sea e nivel di riesgo mas abou.