Prosedura nobo pa menornan di edat pa biahenan den estranheria

ORANJESTAD – Servisio di Imigrashon a pone un formulario standart disponibel onlain pa menornan di edat pa por biaha e fakansi di verano aki.

Tur dos mayor òf tutor mester firma. E menor di edat ku ta biaha pa eksterior sin akompañante òf akompañá pa un di e dos mayornan ku  ta outentiká, mester por mustra ku e otro mayor ku ta outentiká a duna outorisashon pa e biahe.

Derecho di mucha

E prosedura aktual ta okashoná sierto fayo na ora di kontrolá e dokumentunan ku a entregá. Na diferente momentu e ta okashoná bruhashon, tardansa i pèrdida di buelo. Pa e motibu aki Servisio di Imigrashon Arubano a introdusí un formulario uniforme pa tene kuenta ku derecho di mucha i evitá sekuestro.

Den pasado a yega di sosodé kaminda un mayor òf otro persona a hasi maluso di e situashon i a bandoná Aruba ku e menor di edat sin ku e otro mayor sa.

Pa e motibu aki outoridatnan di imigrashon a introdusí un formulario standart pa e proseso nobo aki kaminda un akte di nasementu no ta nesesario mas. Ku e sistema aki servisionan di imigrashon ta haña un base di dato mas amplio, mihó kòntròl i prosesonan mas kòrtiku i mas efisiente.