Kralendijk – Dia 9 di yüni 2021 gobièrnu di Boneiru huntu ku Plenchi di Trabou a sera un akuerdo ku SELIBON ku e meta pa krea kupo di trabou pa un periodo di 6 luna. E grupo akí ta konsistí di 15 empleado ku ta hasiendo un bon trabou i ya kaba por mira resultado di e trabounan di mantenshon i kapmentu di mata na sitio nan públiko ku nan a hasi.

E trabounan di mantenshon i kapmentu di mata a kuminsá na Te Amo bich i bich Pal’i Mangel, miho konosi komo “Donkey Beach” kaminda a hasi diferente tipo di mantenshon, manera fèrfmentu di e espasionan kaminda e kònteinernan di shushi ta situá  pa e kampaña di separashon di shushi na bichnan públiko ku ta bai kuminsá.

Despues a sigui ku e trabounan di kap mata i mantenshon na e kasnan di katibu parti sùit di Boneiru, bich di Sorobon i den sentro di suidat. Den bario di Tera Kòrá tambe a hasi trabounan di mantenshon i kapmentu di mata den kuminsamentu di ougùstùs komo preparashon pa dia di Tera Kòrá.

Seru Largu

Na e momentunan aki e grupo di “Brùg di Oportunidat” ta trahando riba e kaminda pa bai Seru Largu. E siguiente sitio kaminda e grupo  aki ta bai hasi trabou di kap mata i mantenshon ta Kaminda di Turista.

Tur esaki lo yuda redusí e riesgonan pa nos medio ambiente,  salú di tantu nos poblashon komo turistanan, e ta promové higiena en general i ta mehorá kalidat di nos bichnan i sitionan públiko.

---

Lesa tambe:

• 
  Por deskubrí historia di antepasadonan ku e buki ‘Archivo Spièrtá’
• 
  ZJCN ta introdusí mehorashon den seguro médiko pa islanan BES 
• 
  Marco van de Kreeke bèk na aeropuerto Flamingo komo di dos direktor 
• 
  Otro charla mas pa mayornan tokante uso seif di medionan sosial serka mucha
• 
  Entrega di Kalènder 2025 “Ban Topa Nos Grandinan” na Gezaghèber John Soliano