Proyekto nobo mester sostené habitantenan di islanan BES ku plantamentu di propio kuminda

VELP – Ta importá hopi kuminda riba islanan BES, mientras ku lo por planta hopi bèrdura i fruta riba e islanan mes. Ta p’esei algun universidat na Hulanda ta uni forsa i a kuminsá ku e proyekto ‘Food Resilient Futures’. Ta forma studiantenan Karibense na Hulanda, di manera ku nan por duna tayernan di suministro di kuminda salú i lokal na habitantenan di e islanan.

E énfasis ta riba atraé hóbennan riba e islanan. Nan no ta mira agrikultura komo un sektor atraktivo pa traha aden. E hóbennan ta preferá di bai for di e islanan. Tambe ta bini atenshon spesial pa e posishon di kunukeronan chikí. Nan lo bai hunga un ròl sentral den koperashon, lantamentu i ehekushon dentro di e proyekto. 

E proyekto lo bai konsistí di un living lab, un koperashon entre gobièrnu, mundu empresarial, institushonnan edukativo i e komunidat.  Aki por tèst inovashonnan i por haña i kompartí informashon nobo. Riba 28 di yüni tabatin e kick-off ònlain di e proyekto huntu ku e sosionan i a start e proyekto den un ambiente festivo.