KRALENDIJK – Durante e dos temporadanan binidero Boneiru i e klup di futbòl profeshonal PSV ta bai traha intensivamente huntu. PSV ta bai kuminsá ku entre otro aktividat di Soccer School pa laga nos muchanan sera konosí ku PSV Academy. Banda di esei e klup ta bai duna formashon na treinernan lokal. 

E ekspanshon di aktividatnan pa Boneiru ta parti di e strategia di internashonalisashon di PSV. Esaki ta dirigí su mes entre otro riba desempeño di aktividat di visibilidat na Nortamérika, Sentroamérika i Suramérika. Banda di e aktividatnan sosial i di futbòl, PSV ku osten di Brainportpartnership ta bai kompartí konosementu tokante desaroyo di ‘startups’ i empresanan ‘scale-up’. Den region di Brainport, High Tech Campus Eindhoven ta un inkubador pa empresanan nobo i kresiente den e sektor tékniko i ta yuda empresanan nobo òf eksistente ku inisio i desaroyo di nan aktividatnan empresarial

Banda di esei, e inkubador ta sostené entre otro ku alohamentu, entrenamentu di gerensia i akseso na finansiadó i ku trabou di ret. “Esaki ta kuadra ku esfuersonan di Entidat Públiko Boneiru den kuadro di diversifikashon di nos ekonomia. E konekshon di PSV ku Brainport i nan aspirashon kontinuo pa alkansá ‘e siguiente nivel’ ta kuadra ku nos vishon i ta un promé paso den direkshon di un desaroyo ekonómiko duradero pa Boneiru”, segun diputado Hennyson Thielman di Desaroyo Ekonómiko.

Eskoho stratégiko

Boneiru ta poniendo pasonan konkreto pa keda desaroyá su mes sosialmente i ekonómikamente i pa esei ta en buska di partnernan stratégiko. Diputado James Kroon di Deporte ta bisa e siguiente tokante e kolaborashon aki: “Entidat Públiko Boneiru ta mira den PSV un partner ku por duna e deporte i nos isla un ‘boost’.” Nick de Graaf, International sales manager di PSV ta bisa ku durante e temporadanan binidero, e klup ta biaha ku diferente delegashon pa Boneiru. “Nos ta entusiasmá ku nos por kontribuí ekonómikamente i sosialmente ku nos aktividatnan na e isla.” Direktor komersial Frans Janssen ta agregá: “E eskoho pa Boneiru ta unu stratégiko pa nos tambe. Ku e koperashon akí, mas hende ta bin den kontakto ku nos klup i nos vishon. Ku esei nos ta hasi nos alkanse i e impakto di PSV den mundu mas grandi.”