Notisia

Qredits a entregá rapòrt “Small Business Index 2021” na gezaghèber Rijna i diputado Thielman 

KRALENDIJK– Qredits, ONL voor ondernemers i HU Kenniscentrum Digital Business & Media a investigá e impakto ku Covid-19 tabatin riba empresarionan chikitu i mediano na Boneiru, Kòrsou i Aruba. Milagros Blanken, branch manager di Qredits na Boneiru, resientemente a duna un presentashon di e puntonan prinsipal for di e investigashon akí na gezaghèber Edison Rijna i diputado Hennyson Thielman. Na final di su presentashon sra Blanken a hasi entrega di e rapòrt “Small Business Index 2021” na e dos mandatarionan.

E resultado di mas interesante di e rapòrt ta ku tin un diferensia pa loke ta e impakto di Covid-19 riba empresarionan na Boneiru i esunnan na e otro dos islanan. Apesar ku mayoria empresario chikitu i mediano na Boneiru ta ‘starter’ i tin un nivel di preparashon mas abou kompará ku empresarionan na e otro islanan, nan a mustra di tin mihó resistensia pa loke ta trata e impakto di Covid-19. Un faktor ku por a hunga un ròl hopi grandi den esaki ta e sosten ku empresarionan na Boneiru a haña durante di e krísis, ku tabata kasi igual ku e sosten ku empresarionan na Hulanda a haña. 

E diferensia den nivel di preparashon, di otro banda, ta enfatisá e importansia pa krea programanan di formashon i oportunidat pa interkambio di eksperensia via ‘netwerk event’ i tene charla pa asina empresarionan na Boneiru por edifiká i ekipá nan mes mas mihó. Esaki ta un motivashon pa Qredits sigui ofresé programanan di formashon manera Skol di Empresario (ku lo bira “Small Business Academy”) i drenta skolnan sekundario ku e programa di “BeYourOwnBoss”. 

Mester pone atenshon spesial na krea mas fasilidat finansiero, manera supsidio, ku por yuda e empresario na Boneiru rekuperá mas lihé i na un manera sostenibel. Apesar ku e nivel di strès bou di tur empresario ta haltu, hopi ta optimista pa loke ta futuro i nan ta spera di mira adelanto den nan situashon finansiero. Esaki tambe ta pone ku nan no ta konsiderando pa hasi kambio, riba término kòrtiku, den e kantidat di empleado ku nan por tin.   

Qredits i su kolaboradornan lo ehekutá e investigashon aki sigur dos biaha pa aña, pa asina por kompilá mas informashon i monitoriá desaroyo di e empresario chikitu i mediano na Boneiru, Kòrsou i Aruba. Empresario chikitu i mediano ta wesu di lomba di nos ekonomia i ta importante pa detektá i monitoriá nan nesesidat i desaroyo tambe. 

Deel dit artikel
Rocargo
Rocargo
Rocargo
Rocargo