KRALENDIJK – Riba djabièrnè 8 di yüni 2024, Qredits a hasi entrega di sertifikado na 10 kursista ku a finalisá e programa di ‘Small Business Academy’ ku éksito. Qredits Boneiru ke felisitá e partisipantenan aki un bes mas pa a kompletá e kurso ku èksito i ke deseá nan tur kos bon ku nan karera empresarial na Boneiru. 

E futuro empresarionan a risibí nan sertifikado ku hopi orguyo. Na inisio di e anochi Branch Manager, Milagros Blanken, a habri e anochi ku un spich kon orguyoso e ta di mira kresementu den e 10 kuristanan i alabes duna nan palabra di eksito pa sigui perseverá i ekipá nan mes pa ta un empresario eksitoso. Margyane Soliano, komo kordinadó di training i evento na Qredits, Janou Troeman komo un di e dosentenan prinsipal, i Elmosa Charles komo un di e kursistanan tambe a kompartí nan eksperensia durante di e trayektoria i a kompartí palabranan di gradisimentu i ekurashamentu na tur presente, i prinsipalmente na e graduadonan.

‘Small Business Academy’ ta un produkto di Qredits, ehekutá dor di Qredits. Ku e programa di ‘Small Business Academy’ Qredits ke stimulá e klima empresarial di Boneiru i di e forma aki aportá na desaroyo ekonómiko i sostenibel di Boneiru. 

Durante un periodo di 12 siman, diferente lès balioso a keda duná dor di dosentenan Janou Troeman i Maideline Hooi-Martijn. Tambe diferente ‘workshop’ a keda duná dor di instruktornan; Reinisha Molina, Jefferson Rosalia, Chermaine Alberto, Miluska Hansen i Raisa Statie. Apart di esakinan, Kámara di Komèrsio i Industria Boneiru (KvK), Servisio di Impuesto, ENNIA i Asuntunan Social i Labor a duna e kursistanan informashon balioso di aspektonan importante pa hasi un éksito di nan empresanan. 

Diferente tópiko empresarial a bini dilanti durante e programa di ‘Small Business Academy.’ E kursistanan mester a definí nan mishon i vishon, un análisis personal, un análisis di merkado, e desaroyo di e idea di un empresario, e strategianan di merkadeo i un finansiamentu apropiá. Banda di esaki, e kursistanan a sigui e ‘e-learning’ di Qredits. E programa digital aki a yuda e kursistanan pa skibi nan plan di negoshi dor di sigui diferente stap. 

Presentashon

Pa a finalisá e programa, e kursistanan a presentá nan plan na un panel konsistiendo di un representante di Qredits, Diputado Clark Abraham, Phartuchand  Martha, direktor di KvK, i Gaby Felix kende ta un empresario lokal ku hopi eksperensia.