Qredits i ‘Cultuur+Ondernemen’ ta bai traha huntu i lansa ‘Cultuurlening’ pa e Islanan BES

KRALENDIJK – Qredits i ‘Cultuur+Ondernemen’ ta bai lansa huntu un Fiansa Kultural (‘Cultuurlening’) na e Islanan BES. ‘Cultuur+Ondernemen’  ta e  fasilitadó di e ‘Cultuurlening’ i den koperashon ku Qredits, dor di su ret i presensia grandi den Karibe, ta hasi e produkto aki disponibel den Hulanda Karibense. E krédito aki ta pa empresarionan ku ta aktivo òf ke bira aktivo den sektor kultural i kreativo na Boneiru, St. Eustatius i Saba. 

E ‘BES-Cultuurlening’ por keda uzá pa finansiá proyektonan nobo òf invershon nan ku empresarionan den sektor kultural i kreativo ta deseá di hasi. E empresarionan menshoná ta praktiká disiplina nan manera arte visual, fotografia, diseño gráfiko, moda, diseño/arkitektura, teatro i baile, sine/ televishon, multimedia, músika, literatura òf ta parti di un ‘creatieve incubator’. E ‘BES-Cultuurlening’ ta un mikrokrédito di minimal $2.500 i maksimal $40.000. Lo apliká un interes di solamente 1% durante henter e término di e fiansa. E suministrashon di e mikrokrédito aki pa islanan BES lo keda ehekutá via di e ofisina di Qredits na Boneiru.  

Emprendé den e sektor kultural i kreativo 

‘Cultuur+Ondernemen’  ta e plataforma di konosementu pa empresarionan den e sektor kultural i kreativo. Nan ta yuda profeshonalisá organisashon nan kultural, i artísta i kreativo nan independiente. Banda di esaki nan tin hopi aña ta sostené empresarionan den sektor kultural na Hulanda ku entre otro fasilidat di krédito ku interes abou, por ehèmpel ‘Cultuurlening’. Nan ta realisá esaki via di e fondo yamá ‘Cultuur+Financiering’. Riba petishon di e minister di  Enseñansa, Kultura  i Siensia e produkto aki (‘Cultuurlening’) a keda hasí disponibel pa Islanan BES.

“Ku un ‘Cultuurlening’ organisashon nan artístiko, kreativo i kultural por duna nan empresa un stimulashon di bèrdat. Nos ta kontentu di por ofresé e produkto aki, huntu ku Qredits, na empresarionan kultural i kreativo na Boneiru, St. Eustatius i Saba.” – Titia Haaxma, direktora di ‘Cultuur+Ondernemen’ . 

Emprendé Internashonalmente

For di 2009 Qredits ta suministrá krédito i ta ofresé instrumentonan i coaching na empresarionan na Hulanda. Banda di esaki Qredits ta tambe aktivo internashonalmente pa sostene empresario, nobo òf eksistente, pa medio di krédito, coaching òf kursonan. Qredits  ta aktivo for di 2015 den e region Karibense di Reino Hulandes, kuminsando na Boneiru. Seguidamente a bira aktivo na Aruba i St. Maarten (di kua Saba i St. Eustatius tambe) i for di 2018 e ofisina di Kòrsou a keda establesé. Qredits tin 12 aña di eksperensia suministrando finansiamentu.

“Pa medio di e kolaborashon entre Qredits i ‘Cultuur+Ondernemen’  nos a kombiná e puntonan fuerte di tur dos partido. Ku esaki nos ta ofresé akseso na finansiamentu na kondishon nan hopi faborabel. Nos ta hopi orguyoso ku huntu nos por yuda tantu empresarionan nobo komo eksistente den e sektor kultural i kreativo na Boneiru, St. Eustatius i Saba.” – Elwin Groenevelt, direktor general di Qredits. 

Mas ku djis un fiansa

Danki na e ‘BES-Cultuurlening’ empresarionan den sektor kultural i kreativo na e islanan BES lo keda yudá pa medio di un finansiamentu. E término máksimo di e krédito ta 72 luna di kual e empresario no mester hasi pago di amortisashon durante di e promé seis (6) lunanan. Empresarionan por hasi uzo di e krédito aki pa kapital operashonal i invershon nan. Ademas di esaki nan por hasi uzo grátis di Qredits Coach i partisipá na kursonan pa empresarionan. Ku e diferente training nan ku Qredits ta ofresé empresarionan nan por saka e mihó for di nan mes i nan empresa. 

Pa mas informashon i pa hasi aplikashon

Riba nos wèpsait Bonaire-po.qredits.com por lesa mas informashon tokante di e ‘BES-Cultuurlening’ i e kondishon nan. Bo ke apliká pa e krédito aki? Bo por hasi esaki libremente via di nos wèpsait. Pa pregunta por tuma kontakto ku Qredits Boneiru na bonaire@qredits.nl òf via 717-1412.