RINCON- Awe mardugá, 2 di aprel, Rayshantaly Coffie, a risibí su premio komo ganadó máksimo di e kompetensia Kanto Krioyo 2023. E área kreá pa e aktividat den Stadion Antonio Trenidad, tabata bon yená ku hende. Tur hende a gosa e anochi, sigur un aktividat bon organisá. Un tras di otro e kantantenan a presentá kantika riba esenario.

Durante e anochi Glenn Thomas, a risibí plaka di mérito pa e trabou i atenshon ku e ta duna aktividatnan kultural na Boneiru. Glenn, a bisa ya ta 12 aña e ta hasi e trabou na Boneiru, ku hopi amor. “Boneiru ta un ehèmpel pa Kòrsou, kon biba bo kultura, ”Glenn a bisa riba esenario.

Promé ku a saka e ganadónan, Shaedra Bar, ganadó di e último Kanto Krioyo, promé ku e pandemia di vírùs a asotá Boneiru i mundu kompletu, a despedí di su kantika. El a keda 3 aña komo ganadó. No tabatin festival e temporada. Shaedra, a presentá su kantika Kokocha Kokocha i despues a presentá e resultado di ganadónan Kanto Krioyo 2023.

Trabou fuerte

Presidente di hurado a bisa ku e trabou tabata fuerte i e resultadonan ta hopi pèrta. E reakshonnan tabata duna tur indikashon, ku tur hende ta di akuerdo ku e resultado di huradonan, esta ken a gana.

Di 4 finalista Jurnick Clarenda, di 3 finalista Riginald ‘Jonchi’ Dortalina, di 2 finalista Wesley Wewe’ Sint Jago i promé finalista i kantante mas popular, Aimee Janga. Ganadó apsoluto a resultá Rayshantaly Coffie, ku un komposishon di Tico Balentin. Agrupashon musikal tabata na enkargo di FMK.