Notisia

Reakshon di gezaghèber Edison Rijna: Engañoso

“Kon kreibel gezaghèber ta?” ta e pregunta ku a plantia riba e wèpsait di Bonaire.nu den un kontribushon di opinion tokante toma di desishon den Kolegio Ehekutivo relashoná ku Sunset Beach Resort.

Komo ku e artíkulo, meskos ku notisianan anterior di e medio akí i otro medio, ta basá riba informashon inkorekto i uso sugestivo di palabra, mi ta sinti mi yamá pa aklará un ke otro. 

Na promé lugá tokante e prosedura di votashon. E outor ta skirbi ku ami “a vota aktivamente den e promé tanda”. Esaki ta klòp, t’asina ku segun lei (WOLBES) i e reglamento di òrdu, gezaghèber ta obligá pa partisipá na votashon. Hasta no ta pèrmití mi pa vota blanku. E outor ta bisa ku “ta menasá ku den kaso ku votashon tabla hasta mi ta laga mi voto di presidente di ta desisivo.” Esei tambe ta klòp. E regla akí ta poné den mesun lei. 

Ta akusá mi ku regularmente mi ta ekspresá mi preokupashonnan tokante e impakto ku kresementu deskontrolá tin riba nos komunidat, kalidat di bida di Kralendijk, infrastruktura, koheshon sosial, kultura i naturalesa. E outor ta yama esei un “lamento”. Ami mes ta mira esei komo un gritu di kurason na polítika lokal i stakeholdernan pa protehá komunidat kontra desaroyo no deseá. 

Ta bai aki pa mi opinion personal. Opviamente mi no por laga esei konta manera ta spera durante deliberashonnan den Kolegio Ehekutivo, segun e reglamentu di órden di Kolegio Ehekutivo,  ku mi ta tuma un punto di bista den mi ròl komo gezaghèber. E ora ei mi preferensianan personal no ta importá: e ora ei simplemente mi tin ku respetá e prinsipionan básiko di bon gobernashon. Esei ta nifiká ku konseho di servisionan di gobièrnu mester guia mi: si eseinan a base di nan konosementu i investigashon adishonal ta konstatá ku no tin opheshon kontra un petishon òf solisitut, e ora ei por desviá di esei únikamente si otro opheshon ku ta pisa hopi ta konosí. Esaki ta importante, pasobra gobièrnu mester ta pronostikabel: siudadanonan, empresarionan i invershonistanan mester por konfia ku toma di desishon no ta motivá pa arbitrariedat.

Den e artíkulo ta menshoná e asuntu di Chogogo. Esei ta un bon ehèmpel den kua gezaghèber por hasi uso di e poder ku el a haña pa evitá “lo pió”, asumiendo e ròl di intermediadó. E konsiderashon den e dosié akí tabatin di ber ku proporshonalidat. Ta asina ku tabata trata di un situashon ku mester a tolerá solamente durante un periodo kòrtiku, asina ku esaki lo no kondusí na daño na diferente banda. 

E outor ta referí ademas na e kestion di integridat relashoná ku Bonaire Holding Maatschappij i ta bisa ku mi a stroba ku lo a hasi investigashon independiente. Por kontrolá ku e akusashon akí a base di echo ta inkorekto. Hasta a tuma lugá 2 investigashon di parti di organisashonnan independiente ku tin hopi eksperensia riba tereno di investigashon di integridat na gobièrnu. Ami tabata esun ku a duna e enkargo i a publiká e resultadonan mas importante. E investigashonnan kompleto tabata konfidensialmente na Konseho Insular. Despues di esei tabata na Konseho Insular komo representashon di pueblo elegí pa disidí kua konsekuensia lo duna na esei.

Tambe pa e kestion relashoná ku rotònde ta konta ku a buska un ofisina di investigashon eksterno independiente pa esaki, manera a disidí bou di mi presidensia den e grupo piloto Infrastruktura.

Den su último ehèmpel, e outor ta sugerí ku mi ta duna preferensia na interesnan privá riba interes general, pasobra komo miembro di Kolegio Ehekutivo mi a presensiá presentashon di un proyekto di kua e desaroyadó a kontratá mi partner.  Durante e tipo di enkuentronan akí, di kua anualmente tin desénas, nunka no ta tuma desishon. Ta tuma desishon den reunion di Kolegio Ehekutivo, den ousensia di interesadonan, manera den e kestion akí tambe. Den kaso ku proseduranan ta eksigí esei, finalmente Konseho Insular tin e último palabra.

E echo ku rònt di e kestion akí, di parti di vários medio di komunikashon ta publiká asina tantu informashon inkorekto ku por kontrolá, sin nada di chekeo di eseinan, mi ta haña hopi serio. Medionan di komunikashon tin e tarea responsabel pa vigilá e estado di derecho demokrátiko, no pa mina esaki. Den e kaso akí, inhustamente ta deskreditá e instituto di gezaghèber i ta hasi daño innesesario na e kreensia den demokrasia. Mi ta spera ku medionan di komunikashon ta tuma e palabranan akí na kuenta i den futuro ta asumí nan responsabilidat periodístiko na serio ora nan ta publiká e tipo di akusashonnan akí.

Komentario adishonal di Bonaire.nu

Meskos ku Bonaire.nu ta tuma e libertat pa skibi editorial i opiná riba asuntunan i asta personanan, esakinan tambe tin derecho di reakshoná i ventilá un otro opinion. Ta pesei, Bonaire.nu ta publiká re reakshon di gezaghèber integralmente. 

Tòg Bonaire.nu ke duna un reakshon kòrtiku riba dos punto: E promé ta e investigashon den e keho tokante situashonnan indeseabel na Bonaire Holding, manera a keda hasí pa medio di e direktor temporal di e tempu ei. Ta konosí pa Boneiru.nu, i asina ela keda spliká tambe den konseho insular, ku ta gezaghèber mes a skohe kua pidanan di hinter e keho ku a presentá na ekspertonan independiente, i kua no. Na mes manera, te a skohe kua konklushon ela hasi públiko òf nò. Akinan ta traha di eskohonan ku Rijna a hasi. Otro hende, òf otro instansia, por a hasi otro eskoho. Un opinion ku ta diferente for di esun di Rijna, no ke men ku no ta respetando e ofisina di gezaghèber. 

E di dos punt ta trata di e presentashon na Kings Beach Resort. Akinan Bonaire.nu ta keda di opinion ku den kasonan kaminda ku tin un relashon personal entre un konsultant i gezaghèber (òf otro mandatario), ta motibu pa e persona no tei presente mes na reunion ei, òf lo mester a alertá tur partido di antemano di e relashon personal den e kaso spesífiko aki, pa hende tuma esaki na kuenta. Esaki pa e simpel echo ku mester evitá aunke sea sugerensia di un konflikto di interes, ora den futuro mester tuma un posishon riba e proyekto aki, òf mester vota riba un permit. 

Deel dit artikel
Rocargo
Rocargo
Rocargo
Rocargo