KRALENDIJK – Aeropuerto Flamingo ta konsiderá skol di piloto Falki Aviation komo un partner balioso. Esaki direktor di Bonaire International Airport (BIA) a bisa den un reakshon riba e  komentario kritiko di fundadó di Falki, Franklin Antoin. Antoin algun dia pasá a ekspresá su disgustu pa e forma ku e organisashon ta wòrdu tratá pa BIA i su tim di maneo.

“BIA tin hopi apresiio pa Falki i e ròl ku Falki ta hunga den nos komunidat lokal di aviashon. Nos sa tin semper bon kontakto ku Falki. BIA a disidí pa hasi un aera liber pa pone konteiner, di kual vários usuario di BIA por hasi uso, incluso Falki, k uta ta bonbiní einan” segun Van der Scheer a bisa. 

Direktor di BIA a desmentí kategórikamente ku tin favoritismo di parti di BIA. Segun Van der Scheer ta bisa, ta asta trahando riba un mihó lugá pa stashoná e avion di Falki.  “Mi ta konbensí ku nos por sigui ku nos bon koperashon ku Falki”. 

Konteiner

Pa otro banda, no tur hende ta entusiasmá tokante ponementu di konteinernan riba tereno di aeropuerto. “Na 2021, tur konteinernan tabata mester sali saká for di einan, pasobra segun e reglanan, nan tabata forma un peliger. Durante un hurakan, ta peligeroso pa tin konteinernan stashoná einan, pasobra bo por haña e situashon ku bientu ta schuif bai òf asta dal den avion ku ta stashoná riba plataforma”, un persona ku hopi aña trahando na aeropuerto a bisa ABC Online Media djaweps mainta.