WILLEMSTAD – Reda Sosial ta bai drecha entre 90 i 100 kas ku ta den un situashon deplorabel. A reservá seis luna pa esaki. E gastunan ta un mion florin i mei, pues 15.000 florin pa kas.
Na 2018 Reda Sosial a risibí finansiamentu pa delaster biaha di gobièrnu pa un suma total di 1,5 mion florin pa e proyekto. Finalmente a paga 100 mil florin so di e montante ei. Ministerio di Asuntunan Sosial a primintí ku awor si ta bai paga e 1,5 mion ku a primintí.
Reda Sosial ta manehá un lista ku petishon ku ta drenta serka diferente instansha, organisashonnan di bario, serka Reda Sosial mes i via ministerio di SOAW.
Ta analisá kada petishon promé ku bai drecha un kas. Reda Sosial ta akumulá informashon promé ku un persona bini na remarke pa e proyekto.
Ta tene kuenta entre otro ku e situashon sosial den e kas, ken ta doño di e kas i e tereno. Den mayoria kaso ta drecha kas di grandinan ku ta risibí solamente un penshun òf un ònderstant.
Den kasonan ekstremo ta konstruí kas tambe pa hendenan ku ta den nesesidat grandi i kaminda no por drecha nan kas mas.