KRALENDIJK – Dutch Caribbean Cooperation of Airports (DCCA) a hasi yega na un palabrashon pa redusí e asina yamá Passenger Facility Charge (PFC), generalmente yamá ‘airport tax’, pa biahenan entre islanan hulandes den Karibe na 15 dòler pa kada banda, ku mester drenta na vigor na aña 2025.

E redukshon di e PFC lo bai tin un impakto faborabel riba preis di pasashi, ku lo ta visibel den e struktura di preis ku aerolíneanan manera Divi Divi Air, Z-air i Winair ta kobra.

E redukshon lo ser implementá for di yanüari 2025 na Kòrsou i Boneiru, siguí pa Aruba na febrüari. Boneiru, te asina leu, tabata kobrando kaba un montante bou di 15 dòler, pero lo no apliká un oumentu na komienso di 2025, pa evitá ku e montante di PFC lo subi riba 15 dòler.  

Spesialmente, e ruta entre Aruba i Kòrsou lo benefisiá hopi di e redukshon palabrá, e tambe e ruta entre Boneiru-Kòrsou, ounke ku ménos impakto. Den transkurso di aña 2025, aeropuerto Princess Juliana di Sint Maarten tambe lo uni su mes na e inisiativa.

Estudio

E desishon konhunto ta sigui despues di un investigashon ku a demostrá ku kostonan mas abou lo stimulá e tráfiko interinsular. E inisiativa lo yuda promové turismo, koperashon i kresementu ekonómiko den e región. “Aeropuertonan ta konektá nos islanan i ta trese hende mas serka di otro,” e presidente di DCCA, Jonny Andersen a bisa. “Ku kostonan mas abou, nos ta hasi biahenan mas aksesibel i ku esaki nos ta sostené tambe turismo i e ekonomía den nos región.”