Redukshon rápido di Lionfish riba Sababank

THE BOTTOM – Investigashon ku Sababank Management Unit i Wageningen University and Research a ehekutá, a dokumentá e di tres reduskshon rápido di e populashon di  lionfish den e parti óksidental di Oséano Atlántiko for di momentu ku el a yega mas ku trinta aña pasá.

E krísis di e populashon lokal por ta un indikashon ku e lionfish ta alkansá su delaster fase di invashon den e teritorio aki.

A señalá e lionfish, un piská venenoso, prosedente di e Oséano Indio Pasífiko, pa prom’e biaha mas ku trinta aña pasá den Oséano Atlántiko Óksidental. For di e tempu ei e piská a keda ekspandé su mes gradualmente  den e teritorio Karibense te  ku e ta na Sur di Brasil awor. Ounke ta parse ku e populashon tabata ekspandé su mes rápido, na diferente sitio un redukshon di e kantidat ta bira visíbel, di moda ku hopi eksperto ta kere ku e área Karibense lo bai mira un populashon mas stabil òf asta menguante di lionfish.

Boom bust

Un investigashon resien a registrá ku e lionfishnan tabata pegá den kanasternan di piská kòrá i kreft riba Sababank. For di 2010 Saba bank a konosé un kresementu rápido den e kantidat di lionfish pa despues for di 2020 konosé un krísis den e populashon. Esaki ta representá e di tres kaso di susesonan di boom bust (periodonan alternativo ku e poblashon ta krese i baha bèk) di lionfish den Oséano Atlántiko Óksidental Tropikal. 

No ta konosí anda kiko ta e kousa eksakto di e rebaho rápido di lionfish.