KRALENDIJK – Pa promé biaha den historia a transplantá tres sorto di koral den e refnan di Boneiru: koral di strea kòrtá kòrtá (Orbicella annularis), koral di strea montañoso (Orbicella faveolate) i koral di strea grandi (Montastraea cavernosa). 

Fin di 2022 Reef Reward Foundation Bonaire, RRFB, a kuminsá ku transplantá fragmentonan di koral ku kasi 2 aña promé a multipliká via fragmentashon i ku a kultivá den kriadero. Tur tres sorto di koral, di kual 2 tin menasa di ekstinshon, ta pilánan importante di e sistema eco marítimo i lo fortalesé e resistensia di e refnan di Boneiru den e próksimo añanan.

Na inisio na 2012 RRFB tabata konsentrá riba 2 sorto di koral: ‘hertshoornkoraal’ (Acropora cervicornis) i ‘elkhoornkoraal’ (Acropora palmata). Despues e fundashon a ámplia su esfuersonan pa restourashon na mas sorto, promé via nan programa di reprodukshon di larva i awor tambe via téknika di fragmentashon. Ta sumamente importante pa optimalisá e kantidat di sortonan ku ta probechá di e restourashon pa asina perkurá ku e refnan den futuro ta varia genétikamente i ta resistente mas tantu ku ta posibel.

FRAGMENTONAN

Ku pèrmit di gobièrnu i intervenshon di Stinapa,  RRFB a akumulá na 2019 algun fragmento di ‘rotskoraal’ for di kuater kolonia den nan habitat natural rònt Boneiru. A kologá e fragmentonan aki na plantashon di palunan ku a krea spesial i a vigilá nan pa dos aña minusiosamente riba indikadónan manera malesa, kambio di koló i otro faktornan di strès.

Na dezèmber 2022 a hiba e promé ‘rots koralen’ ‘rif-ready’ diferente sitio di restourashon na Boneiru i a transplantá nan ku ayudo di un téknika di pega nobo basá riba semènt. Ta primi e fragmentonan den kupelnan chikitu di semènt fresku i ta pega nan na santu òf piedra: unabes nan a bira duru, e strukturanan aki ta bira parti di e ref, kaminda e tim di Reef Renewal lo keda kontrolá nan. Ounke RRFB ta multiplikando larvanan di ‘rots koraal’ ya pa años kaba, esaki ta promé biaha ku a kultivá i fragmentá kolonianan den un ambiente di kultivo, promé ku planta nan bèk. 

Reef Renewal Boneire ta bisa ku ta sigui ku kultivá i ámplia ‘rots koralen’ den kriaderonan i transplantá nan bèk den ref. E esfuersonan di e Fundashon ta garantisá ku Orbicella annularis, Orbicella faveolate i Montastraea cavernosa, komponentenan prinsipal di e sistema eco marítimo di Boneiru, lo keda floresé meimei di e preshon kresiente.

“Plantamentu pa promé biaha di e fragmentonan di  ‘rots koraal’ tabata un stap krusial pa nos, un stap ku tabata nesesario pa rafiná nos téknikanan di restourashon i establesé protokòlnan di trabou korekto. For di awor nos enfoke ta riba ámplia nan produkshon pa perkurá, ku ayudo di e tim inkreibel aki di boluntario, transplantá kada aña miles di koral den nos refnan”, Francesca Virdis, Chief Operating Officer di Reef Renewal ta bisa.

E proyekto di ‘rots koraal’ no ta solamente importante pa mantené espesienan importante, pero tambe pa garantisá resistensia di e refnan di Boneiru den kuadro di menasanan kresiente lokalmente i mundialmente. Ampliando e kantidat i espesienan di koral ku nan ta transplantá, e Fundashon ta introdusí e diversidat ku ta asina nesesario den e áreanan di ref ku ta afektá, di manera ku nan por resistí mihó e ambiente di awendia ku ta kambia konstantemente i e sirkumstansianan insigur di futuro.