Evento i farándula

Reef Renewal Foundation Bonaire ta papia di Reefiesta 2024 eksitoso 

KRALENDIJK – Reef Renewal Foundation Bonaire a organisá fin di siman ku a pasa Reefiesta. 120 partisipante a haña e oportunidat pa traha na kriadero di koral. Francesca Virdis, direktor di e fundashon, a bisa na final di e dia ku e ta kontentu ku e evento ku tabata unu eksitoso.

“Semper ta hopi strès pa organisá e evento aki”, segun Virdis ku djasabra anochi a bin konta su storia na Bonaire.nu. Nos ta konfrontando hopi retonan logístiko, spesialmente pasobra nos mester manda 120 persona na djestres diferente sitio i mester pèrkurá ku tur tienda di buseo ta bon informá”. 

Fin di siman ku a pasa a traha duru den e kriaderonan di koral di Boneiru. Foto: Reef Renewal Foundation Bonaire. 

Kita alga- i kokolishinan 

ReeFiesta ta e evento mas grandi ku Reef Renewal Foundation Bonaire ta organisá. 120 partisipante, entre kua 100 sambuyadó i 20 persona ku ta snòrkel a yuda e dia ei. E partisipantenan a haña chèns pa traha den e kriaderonan di koral, kaminda nan tabata yuda kita e alga- i kokolishinan, ku ta menasá e koralnan. Personanan ku ta snòrkel a haña chèns pa landa riba e kriaderonan di e fundashon. Nan a haña splikashon di e meta di e diferente proyektonan.

“Nos ke enbolbí e komunidat lokal, no solamente hendenan ku a nase aki, pero tambe e habitante- i turistanan ku ta bini aki tur aña i ku stima e ref,” Virdis ta splika. “E ref ta pertenesé na tur hende ku ta stim’é i ku ke hasi nan bèst pa proteh’é.”

E organisashon di ReeFiesta 2024 ta wak bèk riba un evento eksitoso. Foto: David J. Fishman

Kambio di klima ta brinda retonan 

Ku e temperaturanan di awa ku ta subiendo Reef Renewal Bonaire ta prepará su mes riba posibel blikiamentu di koral. Pa prevení esaki nan ta move sierto koral pa awanan mas hundu i nan ta krea sombra pa protehá nan kontra kalor.

“E aña aki ReeFiesta tabata eksitoso. Nos no por a invitá mas partisipante. Tambe nos a haña sosten di Entidat Públiko Boneiru. Esei tabata hopi agradabel”, segun Virdis. “Otro aña nos ta bai organisá un ReeFiesta nobo. E ora ei nos no ta yama solamente 120 partisipante bonbiní. Nos meta ta pa laga 200 boluntario yuda den e kriaderonan di koral”.

Deel dit artikel
Rocargo
Rocargo
Rocargo
Rocargo