Regata adaptá ku deporte, ku stènt i sin grupo musikal 

KRALENDIJK – Regata ta sigui e aña akí den forma adaptá, asina gezagheber Rijna a duna di konosé na nòmber di Kolegio Ehekutivo. E kompetensianan di boto ta sigui manera planiá, ta pèrmití stènt, pero aktuashon musikal i evento durante anochi no ta posibel e aña akí. Teniendo kuenta ku e kantidat di kontagio i e preshon haltu riba hòspital, Kolegio Ehekutivo a skohe pa un Regata adaptá. Na e momentu akí tin tres pashènt di COVID-19 hòspitalisá. Durante e wikènt tras di lomba un pashènt a fayesé komo konsekuensia di COVID-19.

‘Awor akí ta konsiderá e festividatnan ku normalmente ta tuma lugá durante Regata komo evento di riesgo haltu. Nos a mira kon na nos islanan ruman a surgi brote na fiesta grandi. Si nos wak e kantidat di kontagio na Boneiru i e preshon di esei riba kuido, ta iresponsabel pa organisá evento grandi ku un riesgo haltu awor akí. P’esei ku doló na nos kurason nos a skohe pa un Regata adaptá,’ segun deklarashon di gezaghèber Rijna.