PHILIPSBURG – Durante e kòmbersashon final ku prensa despues di e biahe pa Karibe, Rei Willem-Alexander a pone relashon entre e teremoto na Turkia i Siria i e orkan Irma na 2017 na islanan ariba.

Segun e rei “hopi kos no ta kitá for di kaminda ainda”, pero e habitantenan,  despues di Irma “a kuminsá yen di energia ku rekonstrukshon. E ora ei bo ta mira kiko tur hende ta kapas di hasi: si tur kos ta plat, nan por lanta para bèk tòg.” E rei a haña esei èkstra spesial pasobra despues di esei e islanan mester a dil ku e krísis di corona tambe.

“Loke nos a ripará durante e biahe aki ta ku tur isla ta agradesido ku nan ta miembro di reino. Huntu nos a enfrentá e krísis di corona. Riba tereno di salubridat, remedi i sosten ekonómiko nan a pasa dor di dje i ta bèk na e nivel di antes. Esei ta un gratitut ku nos a sinti tur kaminda”.

E rei a sigui bisa ku su pensamentunan ta ku e víktimanan, famianan, personanan heridá i tambe famianan di personanan na Hulanda prosedente di Siria i Turkia ku no sa di nan famianan i ta biba den un insertidumbre grandi.

E tabatin palabra di gradesimentu tambe pa tur ku a duna asistensia i a menshoná spesialmente  USAR, e tim di reskate Hulandes “ku ta purba di dia i anochi di saka personanan bou di e ruinanan”.