AMSTERDAM – Djamars 22 di novèmber Reina Maxima ta hasi un bishita di trabou na e eksposishon Onze koloniale erfenis den Museo tropikal na Amsterdam. E historia kolonial Hulandes den partinan di Karibe di Reino, Indonesia i Sürnam ta sentral.

Tin djes tema ku ta duna un bista kon kolonialismo a forma e mundu di awendia i kon e hendenan di e tempu ei a soportá e sistema.

E Museo tropikal ke konsientisá i informá bishitantenan tokante  impakto di kolonialismo riba struktura – i relashonnan den nos komunidat aktual, entre otro persepshon i uso di idioma, pa medio di artefakto-, storia-, pelikula-, pòtrèt- i ophetonan di arte.

E eksposishon ta mustra kon hendenan a soportá kolonialismo ku kreatividat, resistensia i fleksibilidat. Temanan di e eksposishon ta entre otro eksplotashon laboral, materia prima i produktonan di e kolonianan, músika, rasismo, idioma i e ‘sintimentu di ta na kas’.

Tin un monumentu di nòmbernan digital ku a base di e nòmbernan ta duna un bista di e relashon entre katibu i nan storianan. Na okashon di e eksposishon algun artista a traha algun obra spesial.

Na yegada di Reina Maxima, Marieke van Bommel, direktor general di Museo nashonal di Kulturanan mundial, lo duna un introdukshon kòrtiku di e eksposishon. 

Ta tèrminá e bishita di trabou ku un kòmbersashon di kontenido ku esnan embolbí na e eksposishon i representantenan for di entre otro enseñansa, sektor kultural i polis.

Den e añanan benidero e eksposishon lo ta permanente. Museo Tropikal lo organisá debate- i presentashonnan rondó di e tema herensia i historia kolonial. Pa alumnonan di enseñansa avansá tin un programa edukativo i material pa lès onlain grátis. Tambe tin programa pa adulto- i profeshonalnan.

E ophetonan di e eksposishon ta parti di e kolekshon di Stichting Nationaal Museum van Wereldculturen bou di kua Museo di Afrika, Museo tropikal i Museo Etnográfiko ta kai.