KRALENDIJK – Mientrastantu polis a duna splikashon via un komunikado di polis i ta informá ku durante e evento di djasabra último a detené un hòmber a base di  strobamentu di órden públiko i buracheria públiko. Ta trata di un hòmber di 31 aña. E sospechoso tabata bou di influensia di alkohòl, tabata hasi fastioso i a kuminsá demostrá komportashon agresivo i mester a deten’é pa esaki. Durante su detenshon el a ekspresá su mes ofensivo den direkshon di e agentenan polisial. Esaki no tabata e reportero Janga.

Segun polis Janga tabata purba di entrevistá e sospechoso ku un telefon i a pidi’é pa hala un banda, pasobra e tabata stroba e transporte di e sospechoso. E no a duna oido na esaki i a sigui ku e entrevista. A bolbe pidi’é un biaha mas pa stòp ku esaki, kaminda a push’é levemente. Despues Janga a bai dirigí riba e agente polisial kaminda, segun e polis, e tabata  demostrá komportashon agresivo. E ora ei e polis a push’é duru te ku Janga a kai. Despues a deten’é pasobra e no a duna oido na e órden polisial.

Den kòmbersashon ku Bonaire.nu Janga ta bisa ku riba e atardi ei e tabata hasiendo un entrevista bibu. Segun Janga no tabatin un promé pushá i asta el a hisa su brasa pa duna di konosé ku ta bon i ku e ta stòp ku e entrevista. Esaki por mira tambe riba e video. “No tabatin kestion di strobamentu, mi kolega di un kadena di televishon tabata pará banda dimi i por konfirmá esaki.” Mientrastantu Janga a hasi denunsia na polis.