Representante di Reino porfin ta tuma akshon i ta eksigí akshon di Kolegio Ehekutivo Boneiru i Saba

KRALENDIJK – Porfin representante di Reino interion Jan Helmond a lanta for di soño profundi i a disidí pa tuma akshon i ta pidi un plan di akshon for di e Kolegio Ehekutivo di Boneiru i Saba relashoná ku publikashon di desishonnan di BC.

“Transparensia i responsabilidat ta esensial pa bon gobernashon públiko i pa krea konfiansa entre komunidat i gobièrnu. Esaki ta tambe e motibu pa kual reglanan a ser akordá pa publiká desishonnan di gobièrnu, inkluyendo desishonnan tumá pa kolegionan di Bestuurscollege di Organisashonnan Públiko Boneiru, Saba i Sint-Eustatius. Esakinan ta menshoná tambe den WolBES i Lei di Publikashon,” Helmond ta skirbi den su karta.

Helmond tambe menshoná ku durante e último kongreso di VNG (Asosiashon di Munisipionan di Ulanda), ela wòrdu aserká algun miembro di Konsehonan Insular ku a ekspresá nan preokupashon tokante e falta di informashon di gobièrnunan lokal, o sea Kolegio Ehekutivo, pa Konseho Insular. 

Además, Helmond ta remarká ku no solamente ta importante pa informá e respektivo konsèhnan di isla, sino tambe e poblashon. “Banda di informá e konsèh di isla, ta di importansia pa habitantenan, empresanan i organisashonnan riba e islanan por tene konosementu transparente di desishonnan tuma pa e Bestuurscollege.”

Plan di Akshon

Helmond awor, ounke formulá na un manera diplomátiko, ta eksiguí un plan di akshon di e Kolegio Ehekutivonan di Boneiru i Saba. “Mirando e importansia di implementashon riba termino kòrtiku, mi ta supliká boso pa informá mi promé ku dia di 1 oktober 2023 tokante un plan di akshon. Mi ta realisá ku esaki ta matéria spesialisá. Si por yuda bo den e proseso aki dor di brindá konosementu òf kapasidat, mi ta dispuesto pa diskutí esaki ku bo.”