KRALENDIJK- E aña akí e tema di Dia Mundial di Nir ta “Nir salú pa tur hende”. Riba djaweps 10 di mart for di 19.00 te 21.00 or tin un reunion di informashon tokante esaki den sentro di bario Tera Kora na Kaya Monseigneur Nieuwindt. E reunion ta na papiamentu. Na radio i televishon tambe lo dediká atenshon na Dia Mundial di Nir.

Hopi biaha hendenan no sa kiko ta e funshon di nos nirnan i kiko ta okashoná daño na nir. Bo no ta ripará ku bo nirnan ta traha ménos bon, te na momentu ku e funshon di nir baha bou di 30%. Un di kada 10 adulto tin daño na nir. Espektativa ta ku durante e añanan binidero esaki ta bai oumentá mas ainda.

Produkto residual

Nos nirnan ta sòru pa saka produktonan residual for di nos kurpa ku e orina ora nos oriná. Ora ku nos nirnan no ta traha bon mas, esaki no ta logra bon mas i líkido por akumulá den nos kurpa. Pa medio di investigashon di sanger òf orina por deskubrí e problema akí.

Tin diferente kousa pa desaroyo di malesa di nir. Serka hende adulto sobrepeso, malesa di suku i preshon haltu ta kousanan ku ta bini dilanti hopi. Na Boneiru e  enfermedatnan akí ta hopi komun. Si por prevení òf trata e enfermedatnan akí bon, esaki ta redusí e chèns pa daño na nir. Mediante deskubrimentu tempran di daño na nir por retrasá deterioro mas aleu.