KRALENDIJK- E Frakshon di partido Demokrátiko Boneriano (PDB) a pidi un reunion públiko di Konseho Insular pa haña splikashon tokante un permit verbal ku gezaghèber Edison Rijna lo a duna Chogogo Resort. 

Sin e permit verbal aki, e hotel lo no por a habri su portanan den transkurso di e siman tras di lomba. E Frakshon di PDB ta haña e desishon di gezaghèber kuestionabel i ta duda tambe tokante su legalidat. Pesei PDB lo ke skucha e kolegio ehekutivo den su totalidat, gezaghèber Rijna mes i tambe Stinapa. 

Dokumento

Banda di esei PDB ke haña tur dokumento di mira ku tin di haber ku e situashon na Chogogo i e desishon di Rijna pa duna un sorto di permit verbal. 

Manera Awor Bonaire ta komprondé tin asta un sierto divishon den sendo di Kolegio Ehekutivo mes, kaminda diputado Nina den Heyer i Hennyson Thielman no ta mashá di acuerdo ku e proceder di gezaghèber i diputado James Kroon na otro banda. 

Espesialmente den seno di MBP tin un miedo ku desishonnan ku ta wòrdu tumá awor, lo por perhudiká e isla den futuru. “Si bo permití Chogogo awor di a hasi manera nan ke, kon bo ta bai para duru kontra di otronan den situashonnan similar den futuru” asina un fuente serka di e debate interno a trese dilanti. 

Coffie

Frakshon Coffie, di miembro di konseho Insular Daisy Coffie, tambe ta hopi krítiko pa ku desishon di gezaghèber. Coffie a bai asina leu di ta tilda gezaghèber di ta ‘mina’ e outoridat di amtenarnan di gobièrnu insular. 

E reunion públiko mientrastantu a wòrdu yamá pa djamars awor, di 7 di desèmber 2021.