KRALENDIJK- Líder di e partido pólitiko ekstra-parlamentario Forsa Sosia Progresivo (FSP), Robby Beukenboom ta preokupá pa e oumento di impuesto na Boneiru. Según Beukenboom, ta parse ku asta despues di 10 aña ainda e situashon sosio-ekonómiko di e pueblo Boneriano no por drecha pa kaba. 

Según Beukenboom, un di e problemanan ta ku mayora desishon ku lo por drecha situashon di siudadanonan ta den man di Hulanda. 

Segun Beukenboom taba intenshon pa yega na un nivel di fasilidat akseptabel na Boneiru, òf un  “een aanvaardbaar voorzieningen niveau”. “Na papiamentu nos por bisa ku nos a entregá nos outonomia “pa nos haña un nivel di fasilidat akseptabel”.  Pero nos por bisa ku ainda despues di 12 aña, nos a keda defroudá”, según Beukenboom ta bisa. 

Mal yu di kriansa

Segun Beukenboom mester bisa tambe ku Hulanda, komo pais madre, ta keda trata e islanan komo un mal yu di kriansa. “Den tur huki di Hulanda, atrabes di varios organo manera Tweede Kamer, Eerste Kamer, Ombudsman, Organisashonnan di Derecho Humano, Kinderombudsman, VNG, ta keda mustra Gobiernu Hulandes riba nan responsabilidat pa duna nos mas ku un man pa asina subi e nivel di “voorzieningen nan” na un manera mas aselerá, na un manera serio, na un manera responsabel”, pero tòg no ku e resultadonan deseá.

“E siman aki ya kaba ta e di dos siman di febrüari. Mas ku un luna a pasa i nos no a mira ku ni gobiernu, ni Konseho Insular a bira nervioso pa e kambio di lei di belasten. Ta siudadanonan sin defensa so mester bira nervioso? Na unda nos mester buska e empatia pa siudania? Pa ken un gobiernu ta”, asina Beukenboom ta puntra. 

Gritu bashí

Beukenboom ta bisa ku e ku su partido a kansa, mientrastantu, di loke e ta deskrib komo gritu bashinan manera ‘Kos Nobo, Renegoshá ku Hulanda, Politikonan hoben ku vishon, derechonan igual ku Hulanda’ . 

Nos ta pidi pa invertí den konfiansa mutuo entre Den Haag i Kralendijk. Skohe direkshon kla, skohe algun tópiko i temanan esensial i traha na un manera dirigí pa yega preferibel huntu ku otro i si no, un pa un.