ROC Mondriaan, CHATA i CTB ta bai lanta un  Hospitality Experience  Center pa Kòrsou

WILLEMSTAD – Instituto pa formashon ROC Mondriaan i organisashonnan CHATA i CTB ta bai traha huntu pa lanta un Hospitality Experience Center pa Kòrsou.

ROC Mondriaan ta spesialisá riba tereno di hospitabilidat i turismo. E Hospitality Experience Center ta bira un instituto di formashon pa studiante- i profeshonalnan den e sektor hotelero i turístiko.

E intenshon ta pa logra ku formashon hotelero i turístiko ta konektá mihó riba sektor turístiko i asina mehorá e servisio na turistanan.

E sentro ta fasilitá programanan di SBO riba tereno di turismo i hospitalidat. E parti práktiko di e programanan ta tuma lugá den e sentro di eksperensia ku ta e hotèl di entrenamentu Academy na Kòrsou. Otro institutonnan di enseñansa manera Maris Stella SBO, Nilda Pinto SBO i Universidat di Kòrsou UoC tambe ta enbolbí.

Durante lunanan benidero hotèl di entrenamentu Academy ta haña un renobashon kompleto pa risibí e wéspetnan. Dosentenan lokal di SBO i UoC huntu ku profeshonalnan lo duna enseñansa dirigí riba guia práktiko i tambe lèsnan teorétiko

E programa- i entrenamentunan ta yuda entrená i prepará hóben- i adultonan na Kòrsou i den region i ta duna nan un perspektiva pa futuro den sektor hotelero i turístiko. Sektor turístiko lo probechá tambe di profeshonalnan altamente kalifiká den sektor hotelero i turístiko.