KRALENDIJK – Djaweps 28 di novèmber 2024 EDADK (Edukashon Kultural Artístiko di Kalidat) ta organisá un programa edukativo i kultural spesial pa ICC’er-, dosente-, direktornan di skol i otro personanan embolbí den e arena kultural na Boneiru.

E espektákulo interaktivo ‘Koló’, presentá pa Roël Calister (Drumdrumdrum), ta tuma lugá na e edifisio di ABVO, Kaminda Jato Baco 36, di 6’or pa 7’or di atardi. Durante e presentashon úniko aki ta hiba e públiko den un eksperensia musikal i kolorido, ku instrumentonan manera ‘boomwhacker’, perkushon, drùm, kanta huntu i perkushon di kurpa. 

‘Koló’ ta kombiná elementonan di un tayer i un presentashon, kaminda e públiko no ta wak i skucha so, pero ta partisipá tambe aktivamente. Asina e ta bira un anochi inspirativo i kreativo pa un i tur ku tin un kurason pa kultura i edukashon.

No pèrdè e chèns aki pa eksperensiá un anochi yen di músika i interakshon!