Sanktuario di Buriku Boneiru ta eksistí 30 aña

KRALENDIJK – Trinta aña pasá Marina Melis huntu ku su kasá Ed Koopman a kuminsá ku kuido di burikunan malu, heridá i wérfano na Boneiru i a funda e fundashon Donkeys Help. Loke a kuminsá chikí ku algun buriku na e asilo di bestia a bira awor un parke di 60 hèktar ku 803 buriku: Sanktuario di Buriku Boneiru. Djabièrnè 26 di mei e asilo di buriku ta kumpli trinta aña.

Na Boneiru tin ainda aproksimadamente mil un shen buriku bibando den naturalesa, segun konteo di e Entidat Públiko Boneiru. Fuera ku un buriku por bira malu, tin regularmente aksidente ku burikunan ora nan ta buska kuminda den anochi. Danki Dios tin kada bes mas instansha i hende na e isla ku ta yama e Sanktuario di Buriku ora nan mira un buriku ku mester di yudansa. Melis i su tim ta tuma akshon mésora i ta buska e buriku pa por kuid’é den e parke. Ora ta nesesario ta yama e veterinario. Si e buriku tin hopi doló, tin ku tuma e desishon difísil pero nesesario pa pone e buriku ‘drumi’.

Unabes ku a risibí e buriku den e parke, e buriku tin un kas sigur pa resto di su bida ku hopi espasio i libertat. Burikunan grandi i chikitu, bieu i hóben ta haña kuminda, awa di bebe i kuido médiko. Tin un parti spesial na unda e burikunan mas bieu di e parke ta biba. Tambe un parti spesial pa kuido di e burikunan vulnerabel i esunnan ku a kaba kapturá. I un parti kaminda burikunan na estado ta biba ku nan yuchinan ku a kaba di nase. Ta kastra e machonan pareu ku nan yega, pero ora kapturá un buriku embra, nuebe di kada djes biaha e ta priñá. Esei ta pone ku regularmente tin trit di ‘beschuit met muisjes’ (un tradishon hulandes ora un yu nase na Hulanda) den e parke.

Informashon

Huntu ku su empleado-, boluntario- i stazjèrnan, Melis ta pone su mes shete dia pa siman disponibel pa duna e burikunan ku a kapturá un bida protehá. Tambe ta duna regularmente informashon tokante e mundu di biba di e burikonan na personanan di e isla, na skol i na turistanan. Bishitantenan por kore un rònchi den e parke i ta bon biní den e parti di kuido pa karisiá  e burikunan i pa saka potrèt. Den e tienda tin artíkulo di benta i tambe por adoptá un buriku. E kontribushon di turista- i spònsernan ta hopi nesesario, sin nan Melis i su tim lo no por a duna e mas ku ochoshen buriku kuminda mas ku un biaha pa dia i mantené e parke.

E amor di Melis pa animal a kuminsá tempran. Komo  mucha el a lanta na un finka. Ora e tabata tin ocho aña el a haña un buriku serka su mayornan pa e kuida. Ora el a yega Boneiru na 1992, el a hasi promé trabou boluntario na Asilo di Bestia. Trinta aña pasa Melis a kuminsá ku e Sanktuario di Buriku Boneiru.

Futuro

Melis ta spera ku den futuro e lo sigui ku e programa di kastrashon, pa e burikunan ku ta bibando ainda riba kaya. Di e manera ei lo tin menos buriku nobo i lo tin un selekshon natural. Esei lo kousa ku e burikunan lo disparsé dimes. “Mil un shen buriko bibando liber ta masha hopi, i nan ta bira kada dia mas,” Melis ta bisa. “Pa kuida tur e mil un shen burikunan aki mester di hopi sèn, i mientras ku tin hopi pobresa bou di hendenan na Boneiru, esei no ta hustu,” e ta añadí. “Mi stima e bestianan, pero no por pone e bestianan riba un tereno a kosto di hende.” Den e situashon ideal Melis ta mira ku por tin aproksimadamente sinkuenta pa shen buriko riba su tereno, pa asina nan por keda bon kuidá i e ta keda pagabel.

E Sanktuario di Buriku ta un eksperiensia pa grandi i chikí. No solamente pa e bishitantenan, pero sigur tambe pa e tim. E ta trabou duru, pero tambe trabou ku ta duna satisfakshon. Regularmente tin stazjèrnan ku ta bini for Hulanda pa e parke en konekshon ku nan estudio di kuido di bestia. I boluntarionan ta mèldu nan mes via medionan sosial, kaminda nan ta sigui e Sanktuario di Buriku, òf despues ku nan a bishitá e sanktuario komo turista òf a tende storia den nan ambiente. Tur hende ku ta traha na e Sanktuario di Buriku tin un kurason grandi pa bestia, i esei mester tambe,  pasobra e burikonan ta na number un.

Djabièrnè 26 di mei 2023 ta un dia spesial pa Melis, Koopman i e tim. Lo no tin fiesta pasobra kada dòler ta nesesario pa duna e burikunan di kome i pa mantené e parke. Al fin al kabo  e burikunan ta number un. Pero un karisia èkstra i un brasa no ta kosta nada, i nan lo risibí esei sigur.