ORANJESTAD- E aerolínea Kolombiano Sarpa lo stòp su buenonan entre Colombia i Aruba entrante dia 10 di yanüari. 

Resientemente Sarpa a anunsiá ku nan lo a stòp di bula entre Medellín i Kòrsou, pero a enfatisá na e momentu ei, ku buelonan pa i for di Aruba si lo a sigui manera kustumber. 

Apenas dos siman despues, e aerolínea a disidí ku lo stòp di bula pa Aruba tambe. Sarpa ta sita hopi kompetensia, gastunan haltu i okupashon abou komo motibu pa stòp su buelonan. 

Na fin di aña 2021 Sarpa tabata e promé ku a kuminsá ofresí buelo stret for di Aruba pa Barranquilla i Medellín. Mientrastantu, Avianca i Wingo tambe a kuminsá buelonan pa i for di Medellin. Esaki a kondusí na un situashon di demasiado oferta pa e kantidat di pasahero ku tin. Lógikamente e situashon aki no ta faborabel pa e kompanianan di aviashon, pero si pa e konsumidó ku ta mira hopi oferta ie preisnan mas abou.