Notisia

SCP: un parti di migrantenan di hopi aña na Hulanda no ta sinti nan bonbiní

DEN HAAG – Di dos generashon di Surnam i Hulandesnan Karibense, ku a nase na Hulanda ta eksperensiá mas i mas eksklushon i deskriminashon i tin tiki konfiansa den polítika. Esei a bini dilanti den un investigashon di e Sociaal en Cultureel Planbureau (SCP) na Hulanda.

Mitar di e kantidat di personanan ku un antesedente di migrashon ku ta pa largu tempu kaba na Hulanda òf ku a nase aki, no ta eksperensiá Hulanda komo hospitalario.

E investigadónan ta konsiderá migrantenan di dos generashon ku un antesendente Turko, Marokano, Surnameo i Hulandes Karibense komo ‘gruponan establesí’.

Nan ta establesé na Hulanda, pero e malkontentu den e grupo aki ta grandi. “Ta trata entre otro di eksklushon, deskriminashon i tiki konfiansa den polítika”, Jaco Dagevos, ku ta un di e investigadónan, ta bisa.

‘Integrashon paradóhiko’

Ounke nan nivel di edukashon i e posishon riba merkado laboral, den komparashon ku nan mayornan, a mehorá, e grupo aki ta eksperensiá tòg mas eksklushon i deskriminashon. Personanan ku antesedente Surnameo i Hulandes-Karibense ta mas pesimista riba esaki ku e otro gruponan.

Segun Dagevos tin mas ku un splikashon pa e integrashon paradóhiko aki. “Un di e deklarashonnan ta ku personanan ku ta relativamente eksitoso ta bini mas den kontakto ku eksklushon riba por ehèmpel merkado laboral òf den enseñansa”, e ta bisa. “ Tambe ta hunga un ròl e echo ku e di dos generashon ta mas embolbí den diskushonnan polítiko i sosial tokante integrashon, rasismo i islam.”

Merkado laboral 

Espesialmente bou di personanan ku antesedente Turko i Marokano e nivel di edukashon i e partisipashon laboral a oumentá hopi, Dagevos ta bisa. “Pero bisando esaki no ta nifiká ku no tin opstákulo”.

For di e investigashon ta resultá ku hopi hende di e di dos generashon tin un trabou temporal i relativamente hopi biaha mester sobrebibí di un supsidio sosial. For di un investigashon anterior a sali na kla ku nan ta eksperensiá deskriminashon na ora di kore stazje i solisitá.

SCP ta pone énfasis ku si ke  pèrkurá pa un komunidat integrá, kaminda tur persona por partisipá,  maneho antideskriminatorio mester ta parti di e maneho di integrashon. “E oumento sosial-ekonómiko no ta sufisiente pa duna e personanan e sentimentu ku nan ta parti di e grupo”, Dagevos ta bisa. “Pesei nos mensahe ta: sin maneho antideskriminatorio bo no tin maneho di integrashon”.

Deel dit artikel
Rocargo
Rocargo
Rocargo
Rocargo