KRALENDIJK- Según e organisashon di hotel i turismo na Boneiru, mester tene kuenta ku e sektor turístiko den e plan di desaroyo di espasio nobo di Boneiru (ROB). 

Segun Bonhata ta bisa den un koseho na gobièrnu, e Masterplan Stratégiko Turístiko di Boneiru ta un guia importante pa ehekushon di desaroyo di espasio (ROB). “Den e plan aki turismo ta den sinergia ku habitante i naturalesa pa sigurá un mihó futuro komo e promé asina yamá “Blue Destination” den karibe. E meta di e plan aki ta pa mehorá Boneiru komo un destinashon atraktivo mei mei di un merkado sumamente kompetitivo”, segun Bonhata ta bisa.   

Chikutu

Segun BONHATA akomodashonnan mas chickitu tin preferensia riba akomodashonnan di eskala mas grandi. Por regulá esaki dor di establesé kondishonnan manera haltura di konstrukshon, densidat di konstrukshon/edifisio, i limite di distansia di e parsela.    

E ROB nobo tambe lo sirbi pa fasilitá adaptashonnan di espasio di aeropuerto, kaminda lo tin espasio pa mehorashonnan nesesario di e maneho di seguridat i tambe pa posibel kresementu di kantidat di pasaheronan kualnan ta bishitá Boneiru tur aña, segun sugerensia di Bonhata.

Banda di esaki Bonhata ta mustra entre otro riba nesesidat ku mester tin un ret di kaminda riba e isla ku ta pas den e vishon pa atraé turista mas pudiente i eksigente na e isla. Finalmente, Bonhata ta krea ku ta importante pa kuida e monumentunan ku Boneiru tin i ademas áreanan importante di naturaleas.