Notisia

Según Daisy Coffie: Komunidat boneriano ta pèrdiendo konfiansa den su gobernashon

Frakshon Coffie ke sa: Kon para ku investigason di Integridat den BHM?

KRALENDIJK- Segun miembro di Konseho Insular, Daisy Coffie di Frakshon Coffie no ta niun tiki kontentu so ku e rumbo ku Boneiru su gobernashon ta bayendo. 

“Ta birando di mas. Mal gobernashon ta na órden di dia. Awor e chèri riba e bolo ta ku nos propio gobièrnu ta mina outoridat di su empleadonan públiko ku gobièrnu mes a enkargá ku e tarea di mantenshon i supervishon di nos lei- i reglanan. Ta trata di lei- i reglanan ku nos mes a traha pa asina nos tin un komunidat na òrdu di manera ku nos no ta konbertí Boneiru den un repúblika di banana kaminda ken ku ke ta, ta hasi kiko ku ta, kon ku ta i ta sali ileso pasobra e ta gosa di protekshon di nos mandatarionan ku gezaghèber na kabes”, asina Coffie ta trese dilanti

Coffie tambe ta mustra riba e echo ku gezaghèber Rijna a huramentá  pa kumpli ku e leinan i ku e mester sigurá kumplimentu ku prinsipionan di bon gobernashon, pero ku e mes ta violando e prinsipionan aki .“E aktitut aki visiblemente tin komunidat iritá, di manera ku den tur sektor bo ta skucha kehamentu i ekspreshonnan fuerte di desaprobashon”, asina Coffie a bisa. 

Konfiansa

SegunCoffie ta bisa, mas i mas komunidat ta pèrdiendo konfiansa den e gobernashon pa motibu ku gobièrnu mes  ta kreando káos. “No tin rèspèt pa otro. Ta parse ku esnan ku kapital mag hasi loke nan ke. Nos hendenan ta sinti nan deskriminá i ta eksperensiá diariamente ku nan ta estranhero riba nan propio isla”, asina Coffie a bisa.

Coffie ta referiendo na e kaso di Chogogo Resort kaminda lo ta aplikando un maneho di toleransia despues ku gezaghèber i un diputado lo a duna instrukshon pa esaki a i ta lanta hopi stòf. “”Na unda integridat den gobernashon a keda. E desishon aki ta legal? Si e ta legal, riba kua lei e ta basá? E ta kargá pa henter Kolegio Ehekutivo òf ta kestion di un egotrep pa gobièrnu no kai tin atrobe, loke ta bolbe tapa e violashon fragante aki?’, asina Daisy Coffie ta puntra. 

Kuenta i rason

Coffie ke awor pa mas pronto posible yama un reunion públiko di Konseho Insular ku karakter di urgensia pa Kolegio Ehekutivo  bin splika i duna kuenta i rason di e manera di proseder deskribí akí riba. 

“Komo representantenan di pueblo nos no por sinta man krusá i mira e debakel akí sigui eskalá”, segun Daisy Coffie a konkluí.

Deel dit artikel
Rocargo
Rocargo
Rocargo
Rocargo