Notisia

Segun Elvis Tjin Asjoe, tráfiko sigur ta kuminsá ku nos mes

KRALENDIJK- Segun lider di partido MPB, alabes diuptado Elvis Tjin Asjoe ta bisa den un deklarason djaweps ku ela tuma nota di e komentarionan tokante e desgrasia di tráfiko ku dos morto. Den ámbos kaso tabata trata di víktima riba baiskel. 

Na promé lugá Tjin Asjoe a ekstendé palabra di kondolensia na famia di esnan ku a pèrdè nan bida den tráfiko resientemente. 

Tambe e diputado ta skibi ku den último dianan na hopi okashon siudadanonan a aserk’é mi via email i app, pero tambe personalmente, ku e mensahe ku nan ta preokupá ku e siguridat den tráfiko riba nos isla. “Mi ta risibí mensahenan i tin biaha tambe grabashon di video di desgrasianan ku no ta alkansá notisia den prensa, komo ku, Dios Grasia, nan tabata leve i ku ningun persona no a resultá heridá. Loke ku ora mi mira e imágennan nos por bisa ku tabata un milager den sierto kaso”, asina Tjin Asjoe a opiná.

“Pa e insiguridat den tráfiko ku ta oumentando tin diferente kousa. Hopi biaha ta pone falta riba e mal kondishon di nos kamindanan, pero den mi bista esaki ta muchu fásil pa tira e falta riba. Nos mester tuma kurashi di para dilanti di spil i wak nos mes tambe i reflekshoná. Diariamente ami mes ta bai kore na pia òf kore baiskel. Si mi no ta paga hopi tinu ami mes, masha biaha kaba lo mi a resultá den hòspital kousá pa e forma riesgoso di komportashon di outomobilista iresponsabel den tráfiko. Di hopi otro persona mi ta tende ku nan tin e mesun eksperensia”. 

Tjin Asjoe a sigui bisa ku lo ta hopi robes ku pa e motibu akí bo ta bai kore ménos na pia, hasi ménos kaminata òf kore baiskel ménos. Komo ku sufisiente moveshon ta netamente saludabel pa nos salú. Mas via pa kaminata òf pa baiskel riba nan mes – tambe pa motibu di e oumento di tráfiko – lo kontribuí na e siguridat den tráfiko, pero esaki no ta algu ku por realisá di awe pa mañan. “Pa e motibu akí mi ta ripití: laga nos reflekshoná riba nos mes komportashon. Den hopi kaso di desgrasia alkohòl ta embolbí”.

Akohòl

Tjin Asjoe a opiná tambe tokante bebementu pa despues stür outo: “Mi ta kere ku tur hende tin derecho riba su biña òf serbes ora nan sali, pero pa bai tras di stür betrá ta sali en buska di desgrasia. Bo no ta pone bo mes bida na peliger pero tambe esun di otro, komo ku un shofùr burachi ta kambia un outo den un arma mortal. Esaki nos no mester akseptá di otro. Komo diputado di entre otro Bienestar, Asuntu di Deporte i Salubridat Públiko mi ta sinti e responsabilidat komun pa trese un kambio”.

Segun e lider di partido blou, unu di kada ocho habitante di Boneiru ta tuma hopi alkohòl, investigashon ta indiká. Uso problemátiko di alkohòl ta kondusí na gastu pa komunidat. Banda di e konsekuensianan di aksidente di tráfiko ta trata di bahada di produkshon, malesa, adikshon, morto promé ku ora i violensia doméstiko, problema den e ambiente di bida personal. Tene tambe na mente e gastunan èkstra pa polis, dòkternan i hòspital i tambe e preshon mental pa agente polisial, empleado di ambulans i enfermeronan. I ademas e sufrimentu enorme kousá na famianan di víktimanan di desgrasia di tráfiko.

Prevenshon

Tambe Tjin asjoe a bisa ku bahada di e uso ekseso di alkohòl ta na su lugá, un meta den e Akuerdo di Deporte i Prevenshon Karibense Boneiru 2019-2022. “Un di mi intenshonnan pa e aña nobo ta pa invitá sekretario di estado Van Ooijen di VWS pa no solamente prolongá e akuerdo, pero tambe pa intensifiká e parti ku ta trata mal uso di alkohòl. Na mes momentu mi ta atmití ku nos mes tambe por i mester hasi hopi mas na esaki”, Tjin Asjoe a terminá.

Deel dit artikel
Rocargo
Rocargo
Rocargo
Rocargo