Sekretario di estado Heijnen ke kumplimentu awor ku Chogogo Resort no a paga multa

DEN HAAG – Sekretario di estado di Infrastruktura i Obras Públiko, Vivianne Heijnen, a pone atenshon den Tweede Kamer riba e situashon aktual rondó di Chogogo Resort.

Ta trata di e playa artifisial di e Resort ku nan a konstruí sin pèrmit i ku parsialmente a spula bai laman. Ademas Chogogo Beach Resort a nenga di hisa e muraya ku ta  wanta e awa i paga e multa.

Señora Heijnen a duna di konosé ku e ke hiba un kòmbersashon ku Entidat Públiko di Boneiru, OLB, pa wak kon por establesé kumplimentu. El a konstatá tambe ku e koral a sufri daño ireparabel a konsekuensia di e santu di e playa artifisial ku a spula bai laman. 

Ta parse ku Chogogo no ta tene su mes na e kondishonnan di pèrmit i tantu OLB komo ministerio di LNV no ta kumpli ku mantenshon.

Señora Heijnen ta supliká gobièrnu pa bai kòmbersá ku OLB pa wak kua asistensia ta nesesario pa kumpli ku mantenshon  i pa pèrkurá ku Chogogo Resort ta kumpli ku e kondishonnan di permit.