Hulanda

Sekretario di Estado Szabó ta primintí akshon pa kamindanan mihó na Boneiru 

KRALENDIJK – Durante un konferensia di prensa resien sekretario di estado Zsolt Szabó a hasi anunsionan importante tokante infrastruktura i desaroyo ekonómiko na Boneiru. Durante e konferensia di prensa Szabó a rekonosé e problema di e kamindanan na Boneiru. Tambe e sekretario di estado a laga sa di ke atendé e problema huntu ku gobièrnu lokal di Boneiru.

“Mi tabata na Boneiru i a mira enbèrdat ku no kada kaya tabata mes bon ku aki na Hulanda Europeo. Di bèrdat mester hasi algu.” El a splika ku ya tin trabounan andando kaba pa drecha e kaminda di Kralendijk pa Rincon. Szabó a indiká tambe ku e gobièrnu lokal mester wak kua fondo nan por pone disponibel i ku e regiodeal (Reino i region ta traha huntu pa mihó ambiente di biba i traha pa habitante- i empresarionan), ku Boneiru ta forma parti di dje, por yuda den esaki.

Fuera di esei e sekretario di estado a enfatisá e importansia di konsulta permanente entre gobièrnunan lokal i Hulandes pa atendé rápido ku e problemanan. “Nos mester keda bon den kòmbersashon tambe ku otro pa konhuntamente atendé e problema mas lihé ku ta posibel,” segun Szabó.

Regiodeal

Banda di e plannan di infrastruktura a anunsiá durante e konferensia di prensa ku Boneiru ta risibí 13 mion euro komo parti di e Regiodeal. E sèn aki ta intenshoná pa invershonnan den entre otro un sentro multifunshonal i konservashon di skolnan. Szabó a bisa asina tokante esaki: “Boneiru mes a duna di konosé di ke invertí e añanan benidero den entre otro un sentro multifunshonal, desaroyo urbano, aksesibilidat i konservashon di skolnan. Tambe por uza e sèn pa infrastruktura.”

Na 2024 a anunsiá anteriormente kaba ku Boneiru lo por a risibí un suma di 16 mion euro pa e próksimo kuater añanan.  Sinembargo lo no tin disposishon riba e suma aki segun e kolegio ehekutivo aktual. “Nos ta bai wak esaki,” segun e sekretario di estado. “Mas lihé Boneiru haña esaki, mihó e ta pa turismo i e poblashon lokal na mi pareser.”

Deel dit artikel