SPIJKENISSE – Na Spijkenisse sentenares di hende a tuma despedida siman pasá di e tres víktimanan kurasoleño di un aksidente di tráfiko fatal na Rotterdam. Durante e aksidente riba di dos dia di Pasku Rinold Curiel (35), Michelle Lala (36) i nan yu muhé Rinaigela di 7 aña a pèrdè nan bida.

Pafó di e kasa funeraria na Spijkenisse tabatin un laman di flor. Un reportero di e emisora regional Rijnmond a kalkulá ku alrededor di 600 hende tabata presente na e despedida.

E asistensia tabata asina haltu ku e oula no por a akapará tur hende. Ounke nan por a sigui e despedida riba pantayanan den e otro espasionan, tòg tabatin hende ku mester a keda para pafó. Tambe algun sentenares di persona por a sigui e despedida via un konekshon di video bibu.

No tur famia por a bini Spijkenisse, hopi di nan ta biba na Kòrsou. Durante e despedida a toka músika di Bob Marley i músika hiphop alegre. Hopi tabata na Papiamentu, e idioma di Kòrsou

Algun persona presente a hiba palabra, entre kua e direktor di e skol kaminda e mucha muhé tabata nan alumno. “Tin un stul bashí den grupo 4”, el a bisa. “Pa semper un mucha di ménos. Nos lo sinti falta di bo sonrisa radiante.”

Despues di e funeral a pone e tres kahanan ku akompañamentu di un brassband riba un mesita ku ta kore pa bou di un arko di honor hiba e famia santana, kaminda a dera nan.