Notisia

Servisio di Impuesto Kòrsou ta bai kobra impuesto pa kue sushi atrasá

WILLEMSTAD – Servisio di impuesto ta bai kuminsá kobra tur impuesto pa kue sushi atrasá. Promé ta Aqualectra mes tabata hasi esei, pero a pasa e enkargo ei pa servisio di impuesto.

Ku e akshon aki ta bai promé pa e kuentanan inaktivo. Aki ta trata debenan ku ta habrí riba kontratonan di Aqualectra ku mientras tantu a terminá, por ehempel ora un kliente muda.

Último añanan a suspendé e traspaso di impuesto pa kue sushi atrasá pa servisio di impuesto diferente biaha. Esaki ta trese kuné ku e retraso a akumulá konsiderablemente. Pa e motibu ei Konseho di Minister a disidí resientemente pa kobra solamente e montantenan ku debe di añanan 2018 te ku 2021 i no hasi e siudadano su bida mas difísil pa retrasonan di aña 2017 i mas bieu. 

Pa e kontratonan aktivo (aktual) Aqualectra lo manda dentro di poko un atvertensia promé ku pasa e kobransa pa servisio di impuesto.

Si resultá ku e pagadó di impuesto mester haña sèn bèk di servisio di impuesto, lo likidá  e eventual impuesto di kue sushi atrasá for di e montante ku e pagadó di impuesto mester haña bèk i e lo haña un karta di servisio di impuesto ku a kita e sèn for di su saldo. 

Deel dit artikel
Rocargo
Rocargo
Rocargo
Rocargo