Kuido i salú

Servisionan i organisashonnan pa kuido di hende grandi a uni forsa pa huntu oumentá kalidat di bida di hende grandi

Miembronan di ‘cockpitgroep’ di robes pa drechi : Alex Schwengle di Fundashon Mariadal, Nicolette Verduin, Salubridat Públiko Boneiru, Genara Timp-Silberie, Zorg en Welzijn Groep, Jocelyn Daris, Zorg en Jeugd Caribisch Nederland, Maideline Martijn, Sentro Akseso, Daniëlle van der Linden, entidat públiko Boneiru, Marcelino Mauricio, Sentro Akseso. Silvana Janga-Serfilia di Direktorado Komunidat i Kuido tambe ta miembro di e grupo, e no por tabata presente na ora di saka portrèt.

KRALENDIJK – E servisionan i fundashonnan pa kuido di hende grandi a uni forsa pa oumentá kalidat di bida di tur hende grandi. Meta di e kolaborashon ta pa tur hende grandi na nan mes manera por sigui partisipá den nos komunidat. I ku tur hende grandi na e momentu korekto ta risibí e kuido ku ta kuadra ku nan deseonan i nesesidatnan personal. E kolaborashon ta forma parti di e maneho di gobièrnu ku e nòmber ‘Bira grandi i keda vital’. Den e maneho a dediká atenshon entre otro na akohida durante dia, kuido na kas, kuido den bario, i kas ku kuido durante 24 ora.

Na òktober 2023 a pone e base pa e kolaborashon entre e servisionan i e fundashonnan. Den e luna ei entidat públiko Boneiru, ministerio di Salubridat Públiko, Bienestar i Deporte, i diesdos organisashon a firma un akuerdo ku otro. For di esaki a surgi e asina yamá ‘Cockpitgroep’ Aliansa den Kadena pa Kuido di Hende Grandi (Cockpitgroep Ketenalliantie Ouderenzorg – CKO). Sentro Akseso, Fundashon Mariadal, Zorg en Welzijn Groep i Salubridat Públiko ta den e ‘cockpitgroep’. E grupo akí ta traha huntu ku gruponan di trabou di ekspertonan pa ehekutá e maneho den práktika. Ta trata e ora ei di por ehèmpel Fundashon Alzheimer Bonaire, Stichting Mantelzorg, Mental Health Caribbean, dòkternan di kas, fisioterapistanan i ergoterapistanan etc.

For di 1 di yanüari di e aña akí Danielle van der Linden ta mènedjer di programa di e ‘cockpitgroep’. Van der Linden ta splika kiko e bentahanan ta di e sistema nobo di kolaborashon. “Na Boneiru tin hopi aktividat bunita i plasentero i vários bon organisashon pa hende grandi. E ret rònt di nos hende grandinan ta bira mas fuerte, na momentu ku tur grupo pa kuido di hende grandi sa mas mihó di otro kiko nan ta hasi. Òf na momentu ku e gruponan ta komplementá otro i sigui desaroyá e plannan ku hende grandi. E ora ei kada hende grandi por sigui partisipá na un manera bon den nos komunidat, i keda biba mas tantu tempu posibel seif na kas. Regularmente mi mes tin kontakto ku hende grandi pa tende si loke nos ta hasi ta kuadra ku loke nan mes ta haña importante”, segun deklarashon di Van der Linden.

E mènedjer di e ‘cockpitgroep’ ta menshoná tambe e plannan pa hende grandi ku ta pendiente pa e aña akí. “Nos ke pa hende grandi ku un petishon pa ayudo, sea ta un petishon chikitu òf grandi, den un forma fásil por haña informashon na un solo lokèt. Por ta trata di un pregunta tokante aktividat, kuido na kas òf otro tipo di aktividat. Banda di esaki nos ta traha riba evaluashon konhunto di e petishonnan pa ayudo, di manera ku tur hende ta haña e kuido korekto na e sitio korekto. Si hende grandi ku por ehèmpel demensia ta biba na kas ainda, nos ke pa fásilmente nan por bai un pasadia adekuá. Finalmente tin plan tambe pa konhuntamente duna formashon i kapasitashon na empleadonan di e organisashonnan.”

Segun Van der Linden e forma intensivo i úniko di kolaborashon akí ta kuadra ku vishon di gobièrnu di Boneiru i Kuido i Hubentut Hulanda Karibense / Salubridat Públiko, Bienestar i Deporte (ZJCN/VWS). E partidonan ke ehekutá e maneho den práktika huntu ku diferente organisashon di Boneiru. Pa pregunta tokante e ‘cockpitgroep’ i tokante e plannan pa kuido di hende grandi, bo por manda un mail na danielle.vanderlinden@bonairegov.com òf yama na 770 2656.    

Deel dit artikel
Rocargo
Rocargo
Rocargo
Rocargo