DEN HAAG – Señora Van Huffelen mester stòp ku preshoná matrimonio homoseksual den e paisnan Karibense den Reino. Esei Roelof Bisschop di Staatkundig Gereformeerde Partij SGP den Tweede Kamer ta remarká.

Bisschop a hasi e mandatario preguntanan por eskrito na okashon di e sentensia hudisial kaminda ta ordená Aruba i Kòrsou pa ainda fasilitá e matrimonio homoseksual. Ámbos gobièrnu mientrastantu a bai den apelashon.

Sekretario di estado Alexandra van Huffelen di Relashonnan di Reino ta lamentá e paso aki i ta atvertí un dia despues ku Aruba i Kòrsou ta kore riesgo di un konflikto ku reino si nan nenga di hasi e matrimonio homoseksual posibel.

Siguridat di derechonan humano segun e sekretario di estado ta un responsabilidat di reino.

Bisschop no ta di akuerdo ku esei. Segun e miembro di Kamer pa SGP por eksperensiá e preshon di e sekretario di estado komo ‘kolonialismo ideológiko’. Bisschop ta di opinion ku Hulanda mester respetá e demokrasia di e paisnan di Reino.